"მეტოქეს ვაჯობეთ, კიდევ მეტის გატანა შეგვეძლო" - ლომიძე აეკ-თან გამარჯვების შემდეგ

UEFA Youth League-ის საკვალიფიკაციო ეტაპის 1/2 ფინალში აეკ ლარნაკასთან, ორი მატჩის ჯამში 6:3, გამარჯვების შემდეგ, დინამო თბილისის მცველმა, გიორგი ლომიძემ Adjarabet Arena-სთან შეხვედრა შეაფასა.

"კონკრეტულად ამ თამაშისთვის მომზადება ძალიან კარგად გავიარეთ და გუნდში შესანიშნავი განწყობა იყო. ვიცოდით, რა მნიშვნელობის მატჩი გველოდებოდა და, საბედნიეროდ, უშუალოდ პროცესისასაც ყველაფერი ჩვენი გეგმის მიხედვით წავიდა.

უპირატესობა ჩვენ მხარეს იყო და მეტოქეს როგორც ტაქტიკურად, ისე ფიზიკურად ვჯობდით. საკმაოდ ბევრი საგოლე მომენტი შევქმენით და კიდევ მეტი გოლის გატანა შეგვეძლო, თუმცა მთავარია, შედეგს მივაღწიეთ.

დიდი მადლობა გულშემატკივარს, რომელმაც ისეთი გარემო შექმნა, რომ ძალიან ამაღლებული განწყობით ვთამაშობდით. ეს ძალიან მნიშვნელოვანი იყო და იმედია, შემდეგ ეტაპზეც მხარში ასევე დაგვიდგებიან, ჩვენ კი ვეცდებით ისევ გავახაროთ", - თქვა ლომიძემ Adjarabet Arena-სთან.

დინამო თბილისი საქართველოს ისტორიაში პირველი გუნდია, რომელმაც UEFA Youth League-ის ორი საკვალიფიკაციო ეტაპი გაიარა და შესარჩევის ფინალს ითამაშებს. დავით გელაშვილის გუნდი შეხვდება ბელარუსულ დინამო მინსკს, რომელმაც ლუდოგორეცს, სახლში 0:1 მარცხის შემდეგ, ბულგარეთში 2:0 მოუგო.

საკვალიფიკაციოს ეტაპის ფინალის პირველი მატჩი - 26 ნოემბერს, ხოლო განმეორებითი 10 დეკემბერს ჩატარდება.