ჩრდილოეთ ლონდონელი მეტოქეები, არსენალი და ტოტენჰემი, შესაძლოა ამ ზაფხულს სატრანსფერო ბრძოლაში ვუნდერკინდისთვის ჩაერთონ, რომელსაც „ახალ კაკას“ უწოდებენ.
GIVEMESPORT ამ თვის დასაწყისში იტყობინებოდა, რომ ამ თინეიჯერ სენსაციას არაერთი კლუბი აკვირდებოდა. ჩელსი, ლივერპული, ატლეტიკო მადრიდი, ბაიერნი, ბორუსია დორტმუნდი და ბენფიკა - ყველა მათგანი ესწრებოდა სამხრეთ ამერიკის 17-წლამდელთა ჩემპიონატის ნახევარფინალს ბრაზილიის წინააღმდეგ.
კოლუმბიამ ეს თამაში 3:0 მოიგო, ფინალში კი არგენტინა 4:0 დაამარცხა და თასს დაეუფლა. მარტინესმა თითოეულ მატჩში საგოლე გადაცემა მიითვალა. GIVEMESPORT-ის ინფორმაციით, მარტინესს ძალიან სურს ევროპაში გადასვლა და მისი შეძენა საკმაოდ ხელმისაწვდომ ფასად იქნება შესაძლებელი, რადგან მას პროფესიონალური კონტრაქტი არ აკავშირებს, თუმცა მისი ასაკის გამო გარკვეული კომპენსაციის გადახდა მაინც საჭირო იქნება.
17 წლის შემტევი ნახევარმცველი თავის პოზიციაზე ერთ-ერთ ყველაზე იმედისმომცემ კოლუმბიელ ტალანტად ითვლება. მის კლუბთან, ატლეტიკო ნასიონალთან, ჯერ კიდევ საჭიროა მოლაპარაკებები წასვლის პირობებზე, მაგრამ ფასი მაინც დაბალი იქნება.
არსენალი და ტოტენჰემი ორივე აქტიურად უკავშირდება მის სახელს. მიუხედავად იმისა, რომ მათი სკაუტები ტურნირზე ოფიციალურად არ დაფიქსირებულან, ეს არ ნიშნავს, რომ ისინი იქ არ იმყოფებოდნენ.
ბაიერნი ასევე მიიჩნევა ერთ-ერთ მთავარ პრეტენდენტად მის გასაფორმებლად. ჟურნალისტი ფილიპ კესლერი წერს: „ბაიერნი კოლუმბიელ მარგალიტს, სამუელ მარტინესს, ბრაზილიის ლეგენდას, კაკას ადარებს. ბავარიელების პარალელურად, ტოტენჰემი და არსენალიც ჩაერთნენ რბოლაში სამხრეთ ამერიკის 17-წლამდელთა ჩემპიონატის ფინალის შემდეგ“.
აღსანიშნავია, რომ ჩრდილოეთ ლონდონურ კლუბებს კოლუმბიელ ფეხბურთელებთან დაკავშირებით დიდი ისტორია არ აქვთ. პრემიერ ლიგაში ამ გუნდების შემადგენლობაში მხოლოდ დავინსონ სანჩესს და დავიდ ოსპინას უთამაშიათ.
