ჰალანდის პასუხი რეალსა და ბარსელონას: სად მიდის ნორვეგიელი?

ჰალანდი მადრიდის რეალსა და ბარსელონას ტრანსფერზე უარს ეუბნება.

ერლინგ ჰალანდმა ესპანურ გრანდებს იმედები გადაუწურა და მანჩესტერ სიტის მიმართ ერთგულება კიდევ ერთხელ დაადასტურა. მიუხედავად ლა ლიგასთან მუდმივი კავშირისა, 25 წლის ნორვეგიელი, რომელსაც კლუბთან 10-წლიანი კონტრაქტი აკავშირებს, ამბობს, რომ მანჩესტერში თავს შესანიშნავად გრძნობს.

ჰალანდმა ESPN-თან საუბრისას ხაზი გაუსვა, რომ არანაირი სურვილი არ აქვს სხვა გამოწვევა ეძებოს. მისი თქმით, კლუბში მიმდინარე ახალი პროექტი მისი ზრდისთვის იდეალურია.

ძალიან ბედნიერი ვარ და მომავალს დიდი მოლოდინით ვუყურებ, რადგან ვფიქრობ, რომ სიტისთვის, როგორც კლუბისთვის და ჩემთვის, როგორც მოთამაშისთვის, წინ საინტერესო დრო გველის. მოუთმენლად ველი სიტიში ასპარეზობის გაგრძელებას

ფორვარდმა პრემიერლიგის მეტოქეებიც გააფრთხილა. მისი აზრით, მას შემდეგ, რაც ახალწვეულები, ჯანლუიჯი დონარუმა, მარკ გეჰი და რაიან შერკი, პეპ გვარდიოლას სისტემას სრულად მოერგებიან, გუნდი კიდევ უფრო გაძლიერდება.

ბოლო წლებში ბევრი ცვლილება მოხდა. ახალი მოთამაშეებისთვის ახალ ლიგასა და ქვეყანაში მოსვლა მარტივი არ არის, ადაპტაციას დრო სჭირდება. ვფიქრობ, წინ ამაღელვებელი პერიოდია და მინდა ამ ყველაფრის ნაწილი ვიყო

ამ დროისთვის მანჩესტერ სიტი შიდა ტრებლის მოპოვებისთვის იბრძვის. თუ გუნდი მომავალ კვირას ევერტონს დაამარცხებს, პირველ ადგილს დაიბრუნებს, მაისის შუა რიცხვებში კი ინგლისის თასის ფინალში ლონდონის ჩელსის დაუპირისპირდება.