"იმდენს მივცემთ, რამდენიც მოუნდება" - საუდის არაბეთში მესიზე ოცნებობენ

ამერიკის შეერთებულ შტატებში გადასვლამდე, იმ პერიოდში, როცა ბარსელონა ლიონელ მესისდაბრუნებაზე ოცნებობდა, ვრცელდებოდა ხმები მისი შესაძლო ტრანსფერის შესახებ საუდის არაბეთის ჩემპიონატში.

თუმცა, მიუხედავად შთამბეჭდავი კონტრაქტის შეთავაზებისა, მესიმ გადაწყვიტა, რომ ფული მისთვის ყველაზე მნიშვნელოვანი არ იყო და ინტერ მაიამიში გადავიდა, მაგრამ ეს იმას არ ნიშნავს, რომ საუდის არაბეთში მისი მიყვანის იდეაზე ბოლომდე უარი თქვეს.

ამის დასტურია, ალ იტიჰადის მფლობელის, ანმარ ალ ჰაილის განცხადება, რომელმაც თქვა, რომ მესის გადასაბირებლად გიჟურ ნაბიჯებზეც კი წავიდოდა.

„თუ ლეო დათანხმდება ალ იტიჰადთან ხელშეკრულების გაფორმებას, მე შევთავაზებ კონტრაქტს, სადაც შეძლებს გამოიმუშაოს რამდენიც უნდა, რამდენ ხანსაც უნდა, თუნდაც სიცოცხლის ბოლომდე.

ფინანსურად ჩემთვის არაფერს ნიშნავს, რომ მესი საუდის არაბეთში ჩვენს მაისურს მოირგებს. მე მინდა მესი, რადგან ასე მეყოლება ფეხბურთის ისტორიაში საუკეთესო მოთამაშე“, - თქვა ალ ჰაილიმ.

ეს არ არის პირველი შემთხვევა, როცა შეიხს ლეოსთან კონტაქტი ჰქონდა. მაშინ, როცა მესი პარი სენ-ჟერმენს თავისუფალი აგენტის სტატუსით ტოვებდა, მან უარი ასტრონომიულ შეთავაზებაზე თქვა.

„დიახ, მაშინაც დავუკავშირდი, როცა მისი კონტრაქტი პსჟ-სთან ამოიწურა. შევთავაზე წელიწადში 1.4 მილიარდი ევრო, მაგრამ მან უარი თქვა, რადგან მის ოჯახს შეერთებული შტატები ერჩივნა.

ამას პატივს ვცემ, ალ იტიჰადი ყოველთვის მიესალმება მას; შეუძლია მოვიდეს, როცა უნდა“, - ალ ჰაილის სიტყვებს Mundo Deportivo ციტირებს.

ამ ეტაპზე ნაკლებად სავარაუდოა, რომ ლიონელ მესი საუდის არაბეთის ვარიანტს განიხილავს, მით უმეტეს, რომ 23 ოქტომბერს მან ინტერ მაიამისთან კონტრაქტის გახანგრძლივება ოფიციალურად დაადასტურა.