ლიონელ მესი ახალგაზრდობისდროინდელ შეცდომებზე ალაპარაკდა და აღიარა, რომ ყველაზე მეტად სწავლის მიმართ ზერელე დამოკიდებულებას, განსაკუთრებით კი ინგლისური ენის არ სწავლას ნანობს.
მისი თქმით, კარიერის განმავლობაში არაერთ მსოფლიო დონის ვარსკვლავს შეხვედრია, თუმცა ენობრივი ბარიერის გამო მათთან საუბარს ვერ ახერხებდა, რაც ძალიან უხერხულ მდგომარეობაში აგდებდა.
ბევრ რამეს ვნანობ, პირველ რიგში იმას, რომ ბავშვობაში ინგლისური არ ვისწავლე. მქონდა ამის დროც და შესაძლებლობაც, მაგრამ შანსი გავუშვი. ხშირად მოვხვედრილვარ ისეთ გარემოში, სადაც საოცარი ადამიანები იყვნენ, მე კი მათთან ვერ ვსაუბრობდი და თავს ნახევრად გაუნათლებლად ვგრძნობდი. სულ ვფიქრობდი: რა იდიოტი ვიყავი, დრო როგორ დავკარგე-მეთქი
მესი იხსენებს, რომ არგენტინაში სწავლის ბოლო წელი მისთვის ნამდვილი კატასტროფა იყო, რადგან უკვე იცოდა, რომ ბარსელონაში მიდიოდა. თუმცა, დღეს ის საკუთარ შვილებს სულ სხვანაირად ზრდის. ლეო მათ მუდმივად შთააგონებს, რომ განათლება და სწავლა უმნიშვნელოვანესია და მაქსიმალურად გამოიყენონ ის პირობები, რაც მას ბავშვობაში არ ჰქონია.
მიუხედავად აკადემიური სინანულისა, მესი მიიჩნევს, რომ ფეხბურთმა მას ცხოვრებისეული სკოლა მაინც გაატარა.
ფეხბურთი მხოლოდ თამაში არაა, ეს ცხოვრების წესია, რომელმაც უამრავი ღირებულება შემძინა, ბევრი რამ მასწავლა და მთელი ცხოვრების მეგობრები მაპოვნინა
