სერია A-ს მსაჯთა დეპარტამენტის ხელმძღვანელმა ინტერთან მატჩში ტურინის იუვენტუსის მცველ პიერ კალულუს „აშკარად არასწორი“ გაძევებისთვის ბოდიში მოიხადა, თუმცა ის ადამიანები გააკრიტიკა, რომლებიც „ყველაფერს ცდილობენ, რომ მსაჯები მოატყუონ“.
კალულუმ შაბათს გამართულ მატჩში, რომელიც ინტერმა 3-2 მოიგო, 42-ე წუთზე მეორე ყვითელი ბარათი მიიღო, როცა ანგარიში 1-1 იყო. მსაჯმა ფედერიკო ლა პენამ ჩათვალა, რომ კალულუმ ალესანდრო ბასტონი წააქცია, რის შემდეგაც ბასტონი დაეცა და მაშინვე ანიშნა მსაჯს, რომ კალულუსთვის ბარათი ეჩვენებინათ.
ეპიზოდის გამეორებამ აჩვენა, რომ კალულუს მხრიდან კონტაქტი არ ყოფილა, თუმცა ვიდეოასისტენტი მსაჯის (VAR) სისტემა ყვითელი ბარათის გადაწყვეტილებებში ჩარევას ვერ ახერხებს.
„ჩვენ ძალიან იმედგაცრუებულები ვართ, როგორც ლა პენას გადაწყვეტილებით, რომელიც აშკარად არასწორი იყო, ასევე იმით, რომ VAR-ის გამოყენება მის გამოსასწორებლად შეუძლებელი იყო.
ლა პენა ძალიან დამწუხრებულია და ჩვენ მას თანავუგრძნობთ, მაგრამ სიმართლე უნდა ვთქვა: ის ერთადერთი არ არის, ვინც შეცდომა დაუშვა, რადგან გუშინ აშკარა სიმულაცია იყო.
ეს მხოლოდ ბოლო შემთხვევაა იმ გრძელი სერიისა ლიგაში, სადაც ყველაფერს ცდილობენ, რომ მოგვატყუონ.“ - განაცხადა ლიგის მსაჯთა დეპარტამენტის ხელმძღვანელმა ჯანლუკა როკიმ იტალიურ საინფორმაციო სააგენტო Ansa-სთან მატჩის შემდეგ.
VIDEO: 5 გოლი და წითელი ბარათი! ინტერმა იტალიური დერბი ბოლო წუთებზე მოიგო
