19 ოქტომბრის კვირა დღის საღამო კლასიკურ ინგლისურ დაპირისპირებას გვაჩუქებს - ლივერპული მანჩესტერ იუნაიტედს დაუპირისპირდება.
წარუმატებული მატჩების შემდეგ, ინგლისის ჩემპიონი თავდაჯერების დაბრუნებას მოსისხლე მტერთან მოგებით შეეცდება, რუბენ ამორიმს კი იმედი აქვს, რომ პრინციპულ შეხვედრაში წარმატება - პირველი ნაბიჯი იქნება გაწელილი კრიზისიდან დასაბრუნებლად.
- ლივერპული - მანჩესტერ იუნაიტედი
- კვირა, 19:30, ენფილდი, მთავარი არბიტრი მაიკლ ოლივერი
ლივერპულისთვის შემოდგომა საუკეთესოდ ვერ დაიწყო. არნე სლოტის შეგირდებმა ყველა ტურნირზე ზედიზედ სამი თამაში წააგეს, რაც ნიდერლანდელი სპეციალისტის სამწვრთნელო კარიერაში სულაც პირველად მოხდა. კრისტალ პალასთან, გალათასარაისთან და ჩელსისთან წაგებებმა გუნდი არამარტო რითმულად მოშალა, არამედ გარკვეული პრობლემებიც გამოაჩინა, რომელიც იქამდე არ ჩანდა: მორყეული დაცვა, კონცენტრაციის დაკარგვა და გარკვეულ ლიდერებზე დამოკიდებულება. ექვს თამაშში გაშვებული ცხრა გოლი - განგაშის ზარია კლუბისთვის, რომელიც თავისი წესებით თამაშს არის მიჩვეული.
წარუმატებელი სერიის მიუხედავად, ენფილდი ციხესიმაგრედ რჩება - ამ სეზონში გუნდმა ხუთიდან ხუთი საშინაო მატჩი მოიგო. ამ სტადიონზე მერსისაიდელები მანჩესტერსაც სტაბილურად უგებენ - იუნაიტედს ენფილდზე 2016 წლიდან არ მოუგია. არნე სლოტს დღევანდელ შეხვედრაში იბრაჰიმ კონატე და რაიან გრავენბერხი უნდა დაუბრუნდნენ, ალისონის დანაკლისს კი გიორგი მამარდაშვილი აღმოფხვრავს.
მანჩესტერ იუნაიტედი ლივერპულში ამაღლებული განწყობით ჩამოდის. არა, იმას ვერ იტყვი, რომ გუნდის თამაში დალაგდა, მაგრამ სანდერლენდთან 2:0 მოგების შემდეგ, გუნდს პრემიერ ლიგის ბოლო სამ მატჩში ორი გამარჯვება აქვს მოპოვებული - როგორც იქნა, გუნდს რაღაც სტაბილურობის მაგვარი ემჩნევა. ამორიმი ნელ-ნელა ახერხებს თავისი ფილოსოფიის დანერგვას - დისციპლინა, კომპაქტურობა და შეტევაში სწრაფი გადასვლა. ბენჟამინ შეშკოს სადებიუტო და მეისონ მაუნტის გოლები იძლევა იმედს, რომ გუნდის შეტევითი პოტენციალი იზრდება.
თუმცა, წითელი ეშმაკების სუსტ წერტილად გასვლითი მატჩები რჩება. იუნაიტედს პრემიერ ლიგაში გასვლითი მატჩი უკვე 8 თამაშია არ მოუგია, რაც პრემიერ ლიგის ბოლო ექვსი წლის ყველაზე ცუდი შედეგია.
ლისანდრო მარტინესის და ნუსაირ მაზრაუის გარეშე გუნდის დაცვა კვლავ პრობლემურ პოზიციად რჩება.
მატჩის პერიპეტიებზე რომ ვისაუბროთ, იუნაიტედს მაღალი პრესინგით და ფლანგიდან შეტევაში სწრაფი გადასვლებით მეტოქისთვის პრობლემების შექმნა შეუძლია, თუმცა ლივერპულის წინააღმდეგ მაღალი დაცვის ხაზით თამაში - თვითმკვლელობაა. ვნახოთ, რას გადაწყვეტს პორტუგალიელი სპეციალისტი.
სავარაუდო შემადგენლობები
ლივერპული: მამარდაშვილი, კერკეზი, ვან დაიკი, კონატე, ფრიმპონგი, მაკ ალისტერი, გრავენბერხი, გაკპო, ვირცი, სალაჰი, ისაკი.
მან იუნაიტედი: ლამენსი, შოუ, დე ლიგტი, იორო, დალო, ბრუნო, კაზემირო, დორგუ, მბიუმო, კუნია, შეშკო.
