მიუნხენ ბაიერნის ვარსკვლავმა, ჰარი კეინმა, ბუნდესლიგის სხვა გუნდები გააფრთხილა და განაცხადა, რომ მისი მიზანი რობერტ ლევანდოვსკის ისტორიული რეკორდის დამხობაა.
ბაიერნის მიერ მორიგი საჩემპიონო ტიტულის აღნიშვნის დროს, ინგლისის ნაკრების კაპიტანმა აღნიშნა, რომ პოლონელი ფორვარდის მიღწევის გაუმჯობესება სრულიად რეალურია.
ლევანდოვსკიმ 2020-21 წლების სეზონში ბუნდესლიგაში 41 გოლი გაიტანა, რაც დღემდე აბსოლუტური რეკორდია. კეინმა, რომელმაც კიოლნთან მატჩში ჰეთ-თრიკი შეასრულა, მიუნხენის მერიის აივნიდან გულშემატკივრებს საკუთარი ამბიციები გაუზიარა:
ეს ჩემი მთავარი მიზანია! ყოველთვის ვამბობ, რომ ყველაფერი ბევრი თამაშის ჩატარებასა და ფორმის შენარჩუნებაზეა დამოკიდებული. ვეცდები, მომავალ სეზონშიც ზუსტად ასე გავაგრძელო. ამ რეკორდის მოხსნა შეუძლებელი ნამდვილად არ არის
ამისთვის 32 წლის კეინს 34-მატჩიან სეზონში მინიმუმ 42 გოლის გატანა დასჭირდება. მიუნხენში გატარებულ სამ სეზონში მან ორჯერ უკვე მოახერხა 36 გოლის გატანა. აღსანიშნავია, რომ ყველა ტურნირზე ერთად გატანილი გოლების რაოდენობით კეინმა ლევანდოვსკის უკვე გადაასწრო, მიმდინარე სეზონში მან 58 გოლი მოაგროვა, მაშინ როცა პოლონელის საუკეთესო მაჩვენებელი 55 გოლი იყო.
მოედნის მიღმა კეინი კლუბთან კონტრაქტის 2030 წლამდე გახანგრძლივებას ითხოვს და ფინანსურ პირობებში გუნდის კიდევ ერთი ვარსკვლავის, ჯამალ მუსიალას ასტრონომიულ ხელფასთან გათანაბრებას გეგმავს. თუმცა, ინდივიდუალურ მიღწევებზე მეტად კეინს გუნდური ტიტულები აინტერესებს, 23 მაისს ბაიერნი გერმანიის თასის ფინალში შტუტგარტს დაუპირისპირდება და კეინს ოქროს დუბლის შესრულება, მომავალ სეზონში კი ვინსენტ კომპანის ხელმძღვანელობით ჩემპიონთა ლიგის მოგება სურს.
