"კლუბის მიმართ ვალდებულებებს შევასრულებ" - ზაბარნი საფონოვთან ურთიერთობაზე

პარი სენ ჟერმენმა ამ ზაფხულს უკრაინის ნაკრების 22 წლის მცველი ილია ზაბარნი ბორნმუთიდან 66 მილიონ ევროდ გაიფორმა.

ამ ტრანსფერის ერთ-ერთი საინტერესო დეტალი ცენტრალური მცველის მომავალი ურთიერთობა პარიზული კლუბის რუს მეკარესთან, მატვეი საფონოვთან იყო.

რუსი კარის დარაჯი პარიზულმა კლუბმა გასულ წელს მოულოდნელად გადაიბირა კრასნოდარიდან დაახლოებით 20 მილიონ ევროდ. საფონოვი მოიყვანეს, რათა კონკურენცია გაეწია ჯანლუიჯი დონარუმასთვის და როგორც ირკვევა, იგი კვლავ დარჩება საფრანგეთის დედაქალაქში, ლუკა შევალიეს შემცვლელად.

Football 360-თან ინტერვიუში, რომელიც L’Equipe-მა გამოაქვეყნა ზაბარნიმ პირველად გაასაჯაროვა დეტალები რუს თანაგუნდელთან ურთიერთობის შესახებ, რუსეთის მიერ 2022 წლიდან დაწყებული ომის ფართო კონტექსტში.

ჩემს ქვეყანაში უკვე ოთხი წელია სრულმასშტაბიანი ომი მიმდინარეობს, რუსები არიან აგრესორები, რომლებიც ამაოდ ცდილობენ უკრაინის თავისუფლებისა და დამოუკიდებლობის განადგურებას.

ყოფილი ბორნმუთელი დასძენს, რომ რუსებთან არანაირი ურთიერთობა არ აქვს. რაც შეეხება საფონოვს, 22 წლის მცველი აღნიშნავს, რომ მასთან „პროფესიონალურ დონეზე უწევს ურთიერთობა ვარჯიშებზე“ და კლუბის მიმართ საკუთარ „ვალდებულებებს ბოლომდე შეასრულებს“.

ზაბარნი, რომელიც უკრაინის ნაკრების ღირსებასაც იცავს, აცხადებს, რომ სრულად უჭერს მხარს „მსოფლიოში რუსული ფეხბურთის სრული იზოლაციის პოლიტიკას.“