კონფერენს ლიგაზე ქართული დუელის პირველი რაუნდი ზივზივაძემ მოიგო

უეფას კონფერენს ლიგის პლეიოფის პირველ მატჩში კოპენჰაგენმა პარკენზე ჰაიდენჰაიმი მიიღო. ორივე გუნდის მხრიდან სათადარიგო სკამზე იყვნენ ქართველები - გიორგი გოჩოლეიშვილი და ბუდუ ზივზივაძე.

შეხვედრაში ანგარიში პირველი ნახევრის ბოლოს, კომპენსირებულ დროში გაიხსნა. ჯორდან ლარსონმა მასპინძლებს ტაიმი მოაგებინა.

59-ე წუთზე სტუმართა მხრიდან ტომას კელერმა შეძლო წონასწორობის აღდგენა. აქედან 2 წუთში კი თამაშში ზივზივაძეც ჩაერთო. 78-ე წუთზე მოედანზე გოჩოლეიშვილიც შემოვიდა, გოლის ავტორი ლარსონის ნაცვლად.

85-ე წუთზე ტიმ სირსლებენმა გაიტანა გოლი და ჰაიდენჰაიმს კოპენჰაგენში გამარჯვება მოუტანა (1-2).

Sofascore-ის ვერსიით, ბუდუმ 6.5 შეფასება დაიმსახურა, გოჩოლეიშვილმა კი - 6.3.

გუნდებს შორის განმეორებითი მატჩი გერმანიაში 20 თებერვალს გაიმართება.