პოლ-ჟოზე მპოკუმ, რომელმაც კარიერის ნაწილი ახლო აღმოსავლეთში გაატარა, GOAL-თან ინტერვიუში განმარტა, თუ რატომ არ უნდა ველოდოთ კრიშტიანუ რონალდუს დაბრუნებას ევროპულ ფეხბურთში.
პარალელურად, მან მოჰამედ სალაჰისა და ლიონელ მესის მომავალზეც საინტერესო პროგნოზები გააკეთა.
კრიშტიანუ რონალდუ ალ ნასრს 2023 წელს შეუერთდა და მას შემდეგ ინდივიდუალურად უმაღლეს დონეს ინარჩუნებს, თუმცა მისი მომავლის შესახებ კითხვები მაინც არსებობს. პორტუგალიელს კონტრაქტი 2027 წლის ზაფხულამდე აკავშირებს და მიუხედავად იმისა, რომ თებერვალში ფინანსების განაწილების გამო უკმაყოფილება გამოთქვა, ის კვლავ გუნდის ლიდერია. მპოკუ დარწმუნებულია, რომ 41 წლის ვარსკვლავი საუდის არაბეთს არ დატოვებს:
არ ვფიქრობ, რომ ის ევროპაში დაბრუნდება. მიმაჩნია, რომ ამას მისთვის აზრიც არ აქვს, განსაკუთრებით იმის გათვალისწინებით, თუ რას გამომუშავებს იქ და როგორ ეპყრობიან მას ადამიანები. როცა ამ ასაკს აღწევ, არის რაღაცები, რაც აღარ გინდა. ვფიქრობ, ის ითამაშებს მსოფლიო ჩემპიონატზე, რომელიც ალბათ ბოლო იქნება მისთვის, შემდეგ კი საუდის არაბეთში დაბრუნდება
რაც შეეხება მოჰამედ სალაჰს, რომელიც ლივერპულთან კონტრაქტის დასრულებას უახლოვდება, მპოკუ მიიჩნევს, რომ ეგვიპტელიც იმავე გზას აირჩევს:
ვფიქრობ, მო სალაჰი სავარაუდოდ საუდის არაბეთში წავა. არ ვიცი, იქნება თუ არა ეს ალ ნასრი, მაგრამ ის იქ გადავა
ბევრს აინტერესებს, შეძლებს თუ არა დევიდ ბექჰემი ინტერ მაიამიში რონალდუსა და მესის გაერთიანებას. მიუხედავად იმისა, რომ არგენტინელს კონტრაქტი 2028 წლამდე აქვს, მპოკუ ამ იდეის მიმართ სკეპტიკურადაა განწყობილი:
არ ვფიქრობ, რომ ეს მოხდება. ჩემთვის გაურკვეველია, რამდენად კარგი იქნება მათი ერთ გუნდში ხილვა, რადგან ორივე უდიდესი ვარსკვლავია და არჩევანი ერთზე უნდა შეაჩერო. ან პრო-მესი ხარ, ან პრო-რონალდუ. არ მგონია, კლუბისთვის კარგი იყოს ორივეს ერთად ყოლა
ამ ეტაპზე ორივე ლეგენდა კარიერის ბოლო თავებს წერს და 1000-გოლიან ნიშნულს უახლოვდება. მიუხედავად იმისა, ითამაშებენ თუ არა ისინი ერთად, გულშემატკივრები მათგან კიდევ ბევრ დასამახსოვრებელ მომენტს ელიან, განსაკუთრებით კი მომავალ მსოფლიო ჩემპიონატზე.
