ლეო მესის მონაწილეობა 2026 წლის მსოფლიო ჩემპიონატზე გარანტირებული არ არის.
როგორც არგენტინული გამოცემა Ole იტყობინება, ამ ეტაპზე არ არსებობს ასპროცენტიანი გარანტია, რომ არგენტინელი მუნდიალზე ითამაშებს. ამ ეტაპზე, ლეოს სამომავლო გეგმების დაწყობა არ სურს და მხოლოდ ვენესუელასთან მოახლოვებულ მატჩზე ფიქრობს, რომელიც 5 სექტემბერს გაიმართება.
38 წლის ფეხბურთელის გარემოცვა კი იტყობინება, რომ მსგავსი მასშტაბის გადაწყვეტილებას ფეხბურთელი აუჩქარებლად მიიღებს.
„გადაწყვეტილება ზედმეტად პირადულია და ის მას მხოლოდ მაშინ მიიღებს, როცა საჭიროდ ჩათვლის." - ამბობს მესისთან დაახლოებული პირი.
ჯერჯერობით ყველაფერი იმაზე მიუთითებს, რომ ლეო მსოფლიო ჩემპიონატზე ითამაშებს. ამაში არგენტინის ნაკრების თავკაცი, ლიონელ სკალონი და ფიფას პრეზიდენტი ჯანი ინფანტინო დარწმუნებულები არიან.
გარდა ამისა, მესის მუნდიალზე მონაწილეობა აშშ-ს პრეზიდენტ დონალდ ტრამპსაც ძალიან სურს.
