ოქროს ბურთის დაჯილდოება ახლოვდება და საფეხბურთო ელიტა ფავორიტებზე ალაპარაკდა, თუმცა ხვიჩა კვარაცხელიას სახელი ამ სიაში სულ უფრო იშვიათად ისმის.
ამჯერად საკუთარი არჩევანი პოლონელმა თავდამსხმელმა, რობერტ ლევანდოვსკიმ დააფიქსირა და ქართველი ვარსკვლავი საერთოდ უგულებელყო.
ლევანდოვსკიმ გულდაწყვეტით აღნიშნა, რომ ენატრება ლიონელ მესისა და კრიშტიანუ რონალდუს ეპოქა, როდესაც ჯილდოს მიღების მხოლოდ ორი-სამი გამოკვეთილი პრეტენდენტი არსებობდა. მისი თქმით, დღეს სიტუაცია აბსოლუტურად გაურკვეველია და დაახლოებით 10 მოთამაშის დასახელება შეიძლება, რომელთაც გამარჯვების რეალური არგუმენტები გააჩნიათ. მიუხედავად ამხელა არჩევანისა, პოლონელმა საკუთარი სამეული ასე ჩამოაყალიბა: მან ღიად ისურვა, რომ ოქროს ბურთი ლამინ იამალს გადაეცეს, რადგან მისი ასაკისთვის ესპანელი საოცრებებს ახდენს.
მეორე ფავორიტად მან ჰარი კეინი დაასახელა და აღნიშნა, რომ ინგლისელი ბაიერნში დაუჯერებელ რაღაცებს აკეთებს და გუნდს ზუსტად ასეთი ფორვარდი აკლდა მისი წასვლის შემდეგ.
მესამე რჩეული კი მაიკლ ოლისეა, რომელსაც ლევანდოვსკიმ უბრალოდ „WOW“ უწოდა და ხაზი გაუსვა მის უნარს, მატჩის მსვლელობა რადიკალურად შეცვალოს.
