ლუკაკუ გუნდში არ ბრუნდება - ნაპოლი მკაცრ ზომებს მიიღებს

ბელგიის ნაკრების თავდამსხმელი რომელუ ლუკაკუ შესაძლოა ნაპოლის გუნდიდან დროებით ჩამოშორდეს, რადგან ანტვერპენიდან არ დაბრუნდა და კლუბთან ვარჯიში არ განაახლა.

ლუკაკუ გუნდში უკვე გასულ კვირას უნდა დაბრუნებულიყო, თუმცა ბელგიაში დარჩენა გადაწყვიტა და ინდივიდუალურად ვარჯიშობდა მას შემდეგ, რაც ფორმის პრობლემების გამო ბელგიის ნაკრების შეკრება დატოვა.

მისმა ქმედებამ ნაპოლის ხელმძღვანელობა გააღიზიანა. სხვადასხვა მედიის ინფორმაციით, კლუბი მას დაუმუქრა, რომ თუ დღეს არ დაბრუნდებოდა, პირველი გუნდის განაცხადიდან ამოიღებდნენ.

იმის გამო, რომ დღეს დილით ვარჯიშზე არ გამოცხადდა, მოსალოდნელია, რომ ნაპოლი შესაბამის ზომებს მიიღებს და მას ფაქტობრივად გუნდიდან ჩამოაშორებს, იტყობინება Sky Sport Italia.

ლუკაკუმ აღნიშნულ საკითხზე პირველად ორშაბათს სოციალურ ქსელში ისაუბრა, თუმცა დაბრუნების შესახებ არაფერი უთქვამს.

„არაფერს ისე არ ვისურვებდი, როგორც ჩემი გუნდისთვის თამაში და გამარჯვება. მაგრამ ახლა უნდა დავრწმუნდე, რომ 100%-ით მზად ვარ, რადგან ბოლო პერიოდში ასე არ ვიყავი და ამან ფსიქოლოგიურადაც იმოქმედა ჩემზე.“ - დაწერა მან.

ნაპოლი სანაკრებო პაუზის შემდეგ მოედანზე 6 აპრილს, ორშაბათს დაბრუნდება, როდესაც სტადიო დიეგო მარადონაზე მილანს უმასპინძლებს.

ნაპოლის ოფიციალური გვერდი ადასტურებს, რომ რომელუ ლუკაკუმ დღევანდელ გამოძახებაზე, ვარჯიშზე დაბრუნებასთან დაკავშირებით, არ უპასუხა. კლუბი იტოვებს უფლებას მიიღოს შესაბამისი დისციპლინური ზომები და ასევე გადაწყვიტოს, გააგრძელებს თუ არა მოთამაშე გუნდთან ვარჯიშს განუსაზღვრელი ვადით.