ნიუკასლთან გამართულ შეხვედრაში, სადაც მეტოქე მოედანზე 10 კაცით იყო დარჩენილი, მანჩესტერ იუნაიტედმა მეტოქის დაცვის გარღვევა მაინც ვერ შეძლო და 2:1 დამარცხდა.
ბრაიან მბეუმო და მათეუს კუნია მუდმივად ცენტრისკენ იწევდნენ. მაიკლ კერიკმა მხოლოდ ბოლო 15 წუთში გადაწყვიტა მოედანზე ამად დიალოს შემოყვანა, ის გუნდის ერთადერთი ნამდვილი ვინგერია, რომელსაც ნიუკასლის კომპაქტური დაცვის გაშლა შეეძლო. ამ დაგვიანებულმა სვლამ მასპინძლებს საქმე გაუადვილა. გარდა ამისა, მანჩესტერელთა განაპირა მცველებს აშკარად არ ჰყოფნით სისწრაფე მთელ ფლანგზე აქტიურობისთვის.
მანჩესტერ იუნაიტედის ინტერესი კვარაცხელიას მიმართ
ბოლო დროს გავრცელებული ინფორმაციით, მანჩესტერ იუნაიტედმა ზაფხულის სატრანსფერო სიაში ბორნმუთის შემტევი, მარკუს ტავერნიე დაამატა, თუმცა ახლა სრულიად სხვა მასშტაბის ვარსკვლავზე ალაპარაკდნენ.
Football Transfers-ის ექსკლუზიური ცნობით, მანჩესტერ იუნაიტედი პსჟ-ს გარემარბის, ხვიჩა კვარაცხელიას ტრანსფერზე მუშაობს
დაძაბულობა პარიზში
კვარაცხელია საფრანგეთის დედაქალაქში ნაპოლიდან 2025 წლის იანვარში, 70 მილიონ ევროდ გადავიდა. ჩემპიონთა ლიგის გამარჯვებული ქართველი პრემიერ ლიგის გრანდების ყურადღების ცენტრში მას შემდეგ მოექცა, რაც გავრცელდა ხმები გასახდელში არსებული უკმაყოფილების შესახებ.
როგორც ირკვევა, პარიზული გუნდის ზოგიერთი წევრი ხვიჩას თამაშით იმედგაცრუებულია. ფეხბურთელების ნაწილი მიიჩნევს, რომ 25 წლის ქართველი, რომელსაც ხშირად დიეგო მარადონას ადარებენ, ზედმეტად ინდივიდუალისტია და მოედანზე ხშირად არასწორ გადაწყვეტილებებს იღებს.
სტატისტიკა და სამომავლო გეგმები
გასულ სეზონში ხვიჩა ლუის ენრიკეს გუნდის ერთ-ერთი წამყვანი ფიგურა იყო და ესპანელ მწვრთნელს ჩემპიონთა ლიგის თასის მოპოვებაში დაეხმარა. თუმცა, მიმდინარე სეზონში მას სტაბილურობა აკლია, რის გამოც პარიზში მისი მომავალი ბურუსითაა მოცული.
პსჟ მზად არის განიხილოს წინადადებები, თუკი დაინტერესებული მხარე შესაბამის ფასს გადაიხდის. კვარაცხელიას გარშემო შექმნილ სიტუაციას მანჩესტერ იუნაიტედთან ერთად არსენალიც დიდი ინტერესით აკვირდება.
