"მადლობა ყველაფრისთვის" - მამარდაშვილი ყოფილ მწვრთნელს ემშვიდობება

საფეხბურთო კლუბი ვალენსია ღრმა მწუხარებით აცხადებს, რომ ღამურების ლეგენდა და ესპანური ფეხბურთის ერთ-ერთი სიმბოლო, ხოსე მანუელ ოჩოტორენა 64 წლის ასაკში გარდაიცვალა.

ვალენსიას ლეგენდარულმა მეკარემ კარიერის დასრულების შემდეგ ასევე დაუვიწყარი კვალი დატოვა მეკარეთა მწვრთნელის როლშიც. ამ ამპლუაში მან ევროპისა და მსოფლიო ჩემპიონობაც მოიპოვა ესპანეთის ეროვნული ნაკრებთან ერთად. ასევე მუშაობდა ვალენსიასა და ლივერპულში.

"ჩვენი გულწრფელი სამძიმარი მის ოჯახს, მეგობრებსა და ახლობლებს. ძალიან მოგვენატრები, თანამებრძოლო. მშვიდად განისვენე." - წერია ვალენსიას განცხადებაში.

ოჩოტორენას გარდაცვალების შესახებ სამძიმარი მადრიდის რეალმაც გამოაქვეყნა.

ოჩოტორენამ რეალში ექვსი სეზონი გაატარა, 1982 წლიდან 1988 წლამდე, რომლის განმავლობაშიც ორი უეფას თასი, სამი ლა ლიგის ტიტული და ერთი ლიგის თასი მოიგო.

რეალისა და ვალენსიას გარდა, იგი თამაშობდა ტენერიფეში, ლოგრონესსა და რასინგ სანტანდერში. ვალენსიაში ყოფნისას მან ზამორას ჯილდო 1989-1990 წლების სეზონში მოიპოვა. ის ესპანეთის ეროვნული ნაკრების წევრი იყო 1990 წლის მსოფლიოს ჩემპიონატზე, რომელიც იტალიაში გაიმართა.

ოჩოტორენას გარდაცვალებას გიორგი მამარდაშვილიც გამოეხმაურა, რომლის კარიერულ წინსვლაშიც ესპანელმა დიდი როლი ითამაშა.

"ადამიანი, რომელმაც უდიდესი გავლენა მოახდინა ჩემს კარიერასა და ცხოვრებაზე, აღარ არის ჩვენთან. მადლობა ყველაფრისთვის, რაც მასწავლე, ნდობისთვის და იმ მხარდაჭერისთვის, რომელმაც გამზარდა, არა მხოლოდ როგორც ფეხბურთელი, არამედ როგორც ადამიანი.

შენი მემკვიდრეობა სამუდამოდ იცოცხლებს ჩვენში, იმ იღბლიანებში, ვისაც შენგან სწავლა გვხვდა წილად. მშვიდად განისვენე, ოჩოტო." - წერს ქართველი მეკარე სოციალურ ქსელში.