ტურნირები კონორ მაკგრეგორის მონაწილეობით ყოველთვის რეკორდულ მაყურებელს იზიდავს, თუმცა მიმდინარე წლის ივლისში ირლანდიელ ვარსკვლავს უდიდესი სატელევიზიო კონკურენციის გადალახვა მოუწევს.
გასულ უქმეებზე, MVP MMA-ის სადებიუტო შოუს მიმდინარეობისას, UFC-ის პრეზიდენტმა დანა უაითმა ინსტაგრამის პირდაპირ ეთერში წლის ერთ-ერთი ყველაზე ხმაურიანი განცხადება გააკეთა. მან დაადასტურა, რომ UFC 329-ის მთავარ ბრძოლაში, 5-წლიანი პაუზის შემდეგ, კონორ მაკგრეგორი ოქტაგონს უბრუნდება და მისი მეტოქე მაქს ჰოლოვეი იქნება.
დაპირისპირება ივლისში, ლას ვეგასში, ტრადიციული საბრძოლო კვირეულის ფარგლებში გაიმართება. კონორის დაბრუნებას სპორტული სამყაროდან უმძიმესი კონკურენტი გამოუჩნდა - 2026 წლის ფეხბურთის მსოფლიო ჩემპიონატი, რომელიც ამერიკის შეერთებულ შტატებში, კანადასა და მექსიკაში გაიმართება.
ტურნირის ძირითადი ბრძოლების დაწყება მსოფლიო ჩემპიონატის მესამე და მეოთხე მეოთხედფინალურ მატჩებს ემთხვევა ზუსტად. ერთ-ერთი შეხვედრა მაიამიში, ამერიკული დროით საღამოს 9 საათზე იწყება, რაც UFC-ის პირდაპირი ტრანსლაციის საათებს კვეთს. მაკგრეგორის მთავარმა მწვრთნელმა უკვე გამოხატა უკმაყოფილება ორგანიზაციის მიერ შერჩეული დროის გამო.
საბრძოლო ხელოვნებათა სამყაროს დიდი ნაწილი სკეპტიკურადაა განწყობილი მაკგრეგორის მიმართ, რადგან მას 2021 წლის შემდეგ (როდესაც დასტინ პორიესთან ბრძოლაში ფეხი მოიტეხა) ოქტაგონზე არ უჩხუბია. მიუხედავად ამისა, მისი ყოფილი მეტოქე, დასტინ პორიე, აცხადებს, რომ ირლანდიელის სათანადოდ შეუფასებლობა დიდი შეცდომა იქნება.
კონორ მაკგრეგორისა და მაქს ჰოლოვეის პირველი დაპირისპირება თითქმის 13 წლის წინ, 2013 წელს შედგა, სადაც გამარჯვება მსაჯების ერთსულოვანი გადაწყვეტილებით ირლანდიელმა მოიპოვა. UFC-ის ხელმძღვანელობა იმედოვნებს, რომ ყოფილი ორმაგი ჩემპიონის დაბრუნება, მსოფლიო ჩემპიონატის ფონზეც კი, მილიონობით მაყურებლის ყურადღებას მიიპყრობს.
