მახაჩევი: "ახალი დივიზიონისთვის საჭირო წონას ვერ ვიმატებ"

ისლამ მახაჩევის თქმით, მსუბუქიდან ქვე-საშუალო დივიზიონში გადასვლის შემდეგ, ის საჭირო წონის მომატებას ვერ ახერხებს.

მსუბუქ დივიზიონში მაქსიმალური წონა 70 კგ-ს შეადგენს, ქვე-საშუალოში კი 77 კგ-ს.

„ვცდილობ მოვიმატო, მაგრამ ადივლი არ არის. მთელი ცხოვრებაა წონას ვიკლებ და ახლა, როცა მომატება მინდა, ჩემი წონა ადგილზე დგას.

უფრო მძიმე წონებით ვვარჯიშობ და მომატების პროგრამას მივსდევ. ამ ეტაპზე, ალბათ 2 კილომდე მექნება მომატებული. რთულია, თუმცა არ მინდა წონა მხოლოდ არაჯანსაღი საკვებით მოვიმატო და არ ვივარჯიშო. რეალური კუნთის მომატება მსურს - სწორი და შესაბამისი ვარჯიშით.

ბრძოლის კვირა ამ დივიზიონში გაცილებით სასიამოვნო იქნება. როცა მსუბუქ დივიზიონში ვიყავი, მთელი გუნდი ჩემი თანდასწრებით ჭამას ერიდებოდა, ჩემი თანადგომის ამბავში. სულ ვეუბნებოდი: "ბიჭებო, ჭამეთ. ჩემს გამო ნუ იტანჯებით." ახლა, მეც მთელ გუნდთან ერთად მივირთმევ საჭმელს.

მსუბუქი წონის დივიზიონში დაბრუნებას რაც შეეხება - ვინ იცის? თუ რაიმე საინტერესო ვარიანტი გამოჩნდა, შესაძლებელია. თუმცა, ამ ეტაპზე ქვე-საშუალო დივიზიონის დროა. ახალი გამოწვევები, ახალი ოპონენტები და მიზნები." - აღნიშნა რუსმა მებრძოლმა.