როდესაც ინგლისის ე.წ. ოქროს თაობის ეპოქა დასრულდა, ემილ ჰესკის სახელი პირველ პლანზე ხშირად არ ყოფილა. მსოფლიო დონის ვარსკვლავებით დაკომპლექტებულ გუნდში, ის ხშირად ერთ-ერთი ყველაზე დაუფასებელი ფეხბურთელი იყო. მიუხედავად ამისა, ლესტერ სიტის, ლივერპულისა და ასტონ ვილას ყოფილ შემტევს ჰქონდა უნარი, გადამწყვეტ მომენტებში თავისი სიტყვა ეთქვა.
პრემიერ ლიგაში ჩატარებულ 510 მატჩში გატანილი 110 გოლით, ჰესკიმ ისეთი კარიერა შეიქმნა, რომელზეც ბევრი თავდამსხმელი მხოლოდ ოცნებობს. ის დღემდე ტურნირის ყველა დროის ბომბარდირთა სიაში 27-ე ადგილს იკავებს - ეს არის დასტური მოთამაშისა, რომელიც კრიტიკის მიუხედავად, ყოველთვის თავდაუზოგავად შრომობდა. მისი ისტორია შესაძლოა ჯერ არ დასრულებულა. მისი 17 წლის ასაკში დებიუტიდან 30 წლის შემდეგ, ჰესკის გვარი საფეხბურთო სამყაროში მეორე აქტისთვის ემზადება.
რეიგან ჰესკიმ, რომელიც 2008 წელს დაიბადა, მანჩესტერ სიტის აკადემიაში ნამდვილი ფურორი მოახდინა. 17 წლის ასაკში ის უკვე პირველ გუნდში მოსახვედრად იბრძვის.
2023 წლის ნოემბერში, მაშინ 15 წლის რეიგან ჰესკი მანჩესტერ სიტის 19-წლამდელთა გუნდში უეფას ახალგაზრდულ ლიგაზე გამოჩნდა, სადაც თავის ძმასთან, ჯეიდენთან ერთად იანგ ბოიზის წინააღმდეგ ითამაშა. მან სადებიუტო მატჩი გოლით აღნიშნა და გუნდს 3:0 გამარჯვებაში დაეხმარა.
მას შემდეგ მისი პროგრესი მეტეორივით სწრაფი აღმოჩნდა. 2024/25 წლების სეზონის წინ ის 19-წლამდელთა გუნდში დააწინაურეს, სადაც თავი მაშინვე გამოიჩინა. პრემიერ ლიგა 2-ის სადებიუტო მატჩში ნორიჯ სიტის წინააღმდეგ, შეცვლაზე შესულმა რეიგანმა ჰეთ-თრიქი სულ რაღაც 22 წუთში შეასრულა.
ახლა ის 17 წლისაა და გასულ სეზონში ჩატარებულ 41 მატჩში გატანილი 27 გოლით ამტკიცებს, რომ აქვს ყველაფერი, რაც მამის კვალზე გასაყოლად არის საჭირო. 2025 წლის სექტემბერში კი მან კიდევ ერთი დიდი ნაბიჯი გადადგა - ძმასთან ერთად მანჩესტერ სიტის მთავარ გუნდში ჰადერსფილდის წინააღმდეგ სადებიუტო მატჩი ჩაატარა.
