მას შემდეგ, რაც სატრანსფერო ბაზარზე რამდენიმე მთავარი სამიზნე ხელიდან გაუშვა, მანჩესტერ იუნაიტედი ნახევარდაცვის გასაძლიერებლად გრანდიოზულ ტრანსფერს გეგმავს.
INEOS-ის ხელმძღვანელობა და გუნდის დროებითი მწვრთნელი, მაიკლ კერიკი, მზად არიან მადრიდის რეალის ვარსკვლავის, ჩუამენის სანაცვლოდ 100 მილიონ ევროზე მეტი გადაიხადონ.
წითელ ეშმაკებს მანამდე მათეუს ფერნანდესის ყიდვა სურდათ, თუმცა ბონუსებზე ვაჭრობის გამო ფეხბურთელი ტოტენჰემმა წაართვა. სანდრო ტონალისა და ელიოტ ანდერსონის ვარიანტების ჩაშლის შემდეგ, კლუბმა მზერა სანტიაგო ბერნაბეუსკენ მიმართა.
ინსაიდერმა ფაბრიციო რომანომ დაადასტურა, რომ 26 წლის ფრანგი იუნაიტედისთვის იდეალური ვარიანტია:
„მანჩესტერ იუნაიტედის შიდა სამზარეულოში ჩუამენი ყოველთვის მიიჩნეოდა ნახევარდაცვის იდეალურ შენაძენად. ელიტარული მენტალიტეტი, მსოფლიო კლასი, კლუბში მას კაზემიროს სრულყოფილ შემცვლელად თვლიან“.
მიუხედავად დიდი ფინანსური მზაობისა, ტრანსფერს ორი მთავარი ბარიერი ეღობება: ფეხბურთელის მაღალი ხელფასი, რომლის შემცირებასაც ინგლისელები ითხოვენ, და მადრიდის რეალის პოზიცია. ჟოზე მოურინიო ჩუამენის თავისი პროექტის უმნიშვნელოვანეს ნაწილად მიიჩნევს და სამეფო კლუბს იუნაიტედისთვის მოლაპარაკებების მაგიდასთან დასაჯდომად მწვანე შუქი ჯერ არ აუნთია.
