მილანის ნახევარმცველმა ლუკა მოდრიჩმა ისაუბრა იმ მწვრთნელებზე, რომლებთანაც საკლუბო კარიერაში უმუშავია და განსაკუთრებით გამოარჩია ჟოზე მოურინიოს როლი მის მიერ განვლილ გზაზე.
პორტუგალიელ სპეციალისტზე საუბრისას მოდრიჩმა აღნიშნა, რომ მოურინიო მისთვის განსაკუთრებული ფიგურაა არამხოლოდ როგორც მწვრთნელი, არამედ როგორც ადამიანი. ხორვატი ნახევარმცველის თქმით, სწორედ მოურინიო იყო ის ადამიანი, რომელმაც ის მადრიდის რეალში მიიყვანა.
"ის განსაკუთრებულია — როგორც მწვრთნელი და როგორც ადამიანი. სწორედ ის იყო, ვისაც ჩემი ხილვა სურდა მადრიდის რეალში. მოურინიოს გარეშე იქ ვერასდროს მოვხვდებოდი. სამწუხაროა, რომ ერთად მხოლოდ ერთი სეზონი გავატარეთ." — განაცხადა მოდრიჩმა.
ასევე საინტერესო შეფასება გააკეთა მოდრიჩმა იმაზე, თუ ვინ არის ყველაზე მკაცრი მწვრთნელი ჟოზე მოურინიუს, კარლო ანჩელოტისა და მასიმილიანო ალეგრის შორის. მისი თქმით, ამ სამეულში ყველაზე მკაცრი მაინც პორტუგალიელია.
"საკუთარი თვალით ვნახე, როგორ მიიყვანა მან კრიშტიანუ რონალდუ ცრემლებამდე გასახდელში. ფეხბურთელი, რომელიც ყოველთვის ასი პროცენტით იხარჯება, მხოლოდ იმიტომ გააკრიტიკა, რომ ერთხელ მეტოქე მცველს არ გაჰყვა, — იხსენებს მოდრიჩი.
ხორვატი ნახევარმცველის თქმით, მოურინიო ფეხბურთელებთან ძალიან პირდაპირი, მაგრამ ყოველთვის გულწრფელია. ის არ არჩევს ვარსკვლავებსა და ახალბედებს და საჭიროების შემთხვევაში ერთნაირად მკაცრია ყველასთან. მოდრიჩმა აღნიშნა, რომ მსგავსი ხასიათი აქვს მასიმილიანო ალეგრისაც.
"თუ რამე არ არის სწორი, ის პირდაპირ გეუბნება ამას თვალებში. გულწრფელობა არის საფუძველი ყველაფრის." — დაამატა მოდრიჩმა.
