ცნობილმა გამოცემა The Guardian-მა ტრადიციულად წელსაც გამოაქვეყნა მსოფლიო ფეხბურთის 60 საუკეთესო ტალანტის სია.
2008 წელს დაბადებული ტალანტების სიაში ვხვდებით დინამო თბილისის ახალგაზრდა მოთამაშის, საბა ხარებაშვილის სახელსაც.
"ხარებაშვილი დინამო თბილისის ცნობილი აკადემიის აღზრდილი არის, რომელმაც გამოზარდა ხვიჩა კვარაცხელია. ბევრს სჯერა, რომ ხარებაშვილი მსგავს დონეს მიაღწევს.
ის გახდა დინამოს ისტორიაში ყველაზე ახალგაზრდა ფეხბურთელი და ასევე ყველაზე ახალგაზრდა, ვინც უეფას ტურნირებში გამოჩნდა - კონფერენს ლიგის დებიუტი გასულ ივლისში ჰქონდა, როცა მხოლოდ 15 წლის და 10 თვის იყო.
ძირითადად მარცხენა მცველი, თუმცა უკვე აჩვენა უნივერსალურობა - ითამაშა მარჯვენა ფლანგზეც და თუნდაც №10 პოზიციაზეც. ფიზიკურად ძლიერია, შრომისმოყვარე და გონიერი; მას გამოარჩევს პოზიციური აზროვნება და ჩაჭრის უნარი, ასევე სისწრაფე და ზუსტი ჩაწოდებები კონტრშეტევებისას.
ხარებაშვილს უკვე ჰქონდა დებიუტი საქართველოს ეროვნულ ნაკრებში და მისი პროგრესი ევროპის ტოპ კლუბების ყურადღების ქვეშაა - მას რეალი და ბარსელონა აკვირდებიან. ითვლება, რომ ლივერპული მას მარცხენა მცველის პოზიციაზე გრძელვადიან გადაწყვეტად განიხილავს." - წერს The Guardian.
The Guardian-ის წლევანდელ სიაში ხარებაშვილთან ერთად მოხვდნენ იბრაჰიმ მბაიე (პსჟ), ფრანჩესკო კამარდა (ლეჩე, იჯარით მილანიდან), დრო ფერნანდესი (ბარსელონა), ტონი ფერნანდესი (ბარსელონა), ბერნარდუ ლიმა (პორტუ), ჟოზე ნეტუ (ბენფიკა), დანიელ ბანჟაკი (ბენფიკა), ანჯელო კანდიდო (სან პაულო), გაბრიელ მეკი (გრემიო), კაუა პრატესი (კრუზეირო).
