მსოფლიო ჩემპიონატების ისტორიაში ერთ-ერთი უდიდესი სენსაცია დაფიქსირდა.
ტურნირის დებიუტანტმა კაბო-ვერდემ ევროპის მოქმედ ჩემპიონ ესპანეთს ქულა წაართვა (0:0). მატჩის მთავარი გმირი აფრიკელთა 40 წლის ვეტერანი მეკარე, ვოზინია გახდა, რომელმაც ატლანტაში გამართულ შეხვედრაში 7 საოცარი სეივი შეასრულა და მატჩის საუკეთესო მოთამაშედ დასახელდა.
ცრემლები ისტორიული მატჩის შემდეგ და სავიზო პრობლემები
მიუხედავად უდიდესი საფეხბურთო მიღწევისა, ვოზინიასთვის ეს საღამო ემოციურად მძიმე აღმოჩნდა. მატჩის შემდეგ მეკარემ ჟურნალისტებთან საუბრისას ცრემლები ვერ შეიკავა და აღიარა, რომ მისი ოჯახის წევრებმა ამ ისტორიული მომენტის ტრიბუნებიდან ნახვა ვერ შეძლეს.
მატჩის შემდეგ ავტირდი. ბავშვობაში ბებია და ბაბუა მზრდიდნენ, რომლებიც რამდენიმე წლის წინ გარდაიცვალნენ და აქ ვერ მნახეს. ვერც დედაჩემი ჩამოვიდა შტატებში სავიზო პრობლემებისა და ფინანსების გამო, საბუთების დროულად მოგვარება უბრალოდ ვერ მოვასწარით. ეს თამაში კაბო-ვერდეს თითოეულ მცხოვრებს ეკუთვნის. ჩვენ პატარა ქვეყანა ვართ, რთული გზა გამოვიარეთ და დღეს ოცნება ავისრულეთ
რეკორდსმენი მეკარე, რომელიც პროფესიონალი 25 წლის ასაკში გახდა
ვოზინიამ ამ მატჩით მსოფლიო ჩემპიონატების რეკორდიც დაამყარა - 40 წლისა და 12 დღის ასაკში ის გახდა ყველაზე ხანდაზმული ფეხბურთელი, ვისი დებიუტიც ნაკრების ისტორიაში პირველ მუნდიალზე შედგა. ტურნირის ისტორიაში მასზე უფროსი მხოლოდ ეგვიპტელი ესამ ელ-ჰადარი იყო, რომელმაც 2018 წელს 45 წლის ასაკში ითამაშა.
ვეტერანმა გოლკიპერმა საკუთარ უცნაურ კარიერაზეც ისაუბრა, რომელიც მოლდოვაში, სლოვაკეთსა და კვიპროსში გაატარა, ახლა კი პორტუგალიის მეორე ლიგის შავეშში თამაშობს:
25 წლამდე პროფესიონალურ დონეზე საერთოდ არ ვთამაშობდი. დღეს კი 18 წლის ვოზინიას ვეტყოდი, რომ საკუთარი თავით იამაყოს. ბავშვობაში ასეთ რამეზე ვერც ვიოცნებებდი, მაგრამ ახლა ზუსტად ვიცი - ამ ყველაფრისთვის ბრძოლა ღირდა
ესპანეთთან მოპოვებული ქულის შემდეგ, კაბო-ვერდეს ჯგუფში ურუგვაისა და საუდის არაბეთთან მატჩები ელის და პლეი-ოფში გასვლის რეალური შანსი აქვს.
