მაიკლ ოლისე მიუნხენის ბაიერნიდან მადრიდის რეალში სარეკორდო ტრანსფერით გადასვლას უახლოვდება, თუმცა ფრანგ ვარსკვლავს ურჩევენ, რომ გერმანიაში კიდევ ერთი წელი დარჩეს.
პრემიერ ლიგის ყოფილი ფეხბურთელი ჟერემი ალიადიერი მიიჩნევს, რომ ოლისემ მადრიდული წნეხის გამკლავება ჯერ უნდა ისწავლოს და გარემოს შეცვლაზე ფიქრი ნაადრევია.
24 წლის გარემარბმა ბოლო წლებში წარმოუდგენელი პროგრესი განიცადა. ჩემპიონშიფიდან დაწყებული კარიერა 2026 წლის მსოფლიო ჩემპიონატის ნახევარფინალით გაგრძელდა. გასულ სეზონში მან ბაიერნის მაისურით 25 გოლი და 28 საგოლე გადაცემა მიითვალა, რითაც ჰარი კეინთან ერთად ზედიზედ მეორე ბუნდესლიგა მოიგო. მუნდიალზე კილიან მბაპესა და უსმან დემბელეს გვერდით ბრწყინვალე თამაშმა კი მისი ფასი კიდევ უფრო გაზარდა.
ესპანური გრანდი მზადაა, ოლისე სანტიაგო ბერნაბეუს ახალ გალაქტიკოდ აქციოს. ვრცელდება ინფორმაცია, რომ რეალი 223 მილიონი ევროს გადასახდელად ემზადება, რაც ნეიმარის აბსოლუტურ რეკორდს დაამხობს და ფრანგს ისტორიაში ყველაზე ძვირადღირებულ ფეხბურთელად აქცევს.
ალიადიერის აზრით, რეალში გადასვლა ოლისესთვის უდიდესი რისკია, რადგან იქ ვინისიუსთან და ბელინგემთან ერთად თამაში იდეალურ ბალანსს მოითხოვს. მისი თქმით, ოლისესთვის საუკეთესო გადაწყვეტილება ბაიერნში კიდევ ერთი სეზონის გატარება და ბუნდესლიგის მშვიდად მოგება იქნება, რის შემდეგაც მადრიდულ წნეხში და ქაოსში გადაშვება ბევრად მარტივი გახდება.
ბაიერნს ფრანგთან კონტრაქტი 2029 წლამდე აკავშირებს და მისი გაყიდვა არ ეჩქარება. თუმცა, თუ ჟოზე მოურინიო და მადრიდის რეალი მაგიდაზე 223 მილიონ ევროს დადებენ, მიუნხენელთა წინააღმდეგობა აუცილებლად გატყდება. ჯერჯერობით უცნობია, სად დაიწყებს ოლისე 2026-27 წლების სეზონს, მაგრამ ფაქტია, რომ მასზე ნადირობა უკვე დაწყებულია.
