ტომას ტუხელმა ახალი კონტრაქტი გააფორმა და ინგლისის ეროვნული ნაკრების მთავარი მწვრთნელი 2028 წლის ევროპის ჩემპიონატამდე იქნება, რომელიც გაერთიანებულ სამეფოსა და ირლანდიაში გაიმართება.
მას შემდეგ, რაც ტუხელმა „სამ ლომს“ მსოფლიო ჩემპიონატის საკვალიფიკაციო ეტაპი წაუგებელი სერიით, წარმატებით დაასრულებინა, იგი კიდევ ორი წლით მთავარ მწვრთნელად დარჩენას დათანხმდა.
ინგლისის ნაკრებმა წარმატებული კამპანიის განმავლობაში ერთი გოლიც არ გაუშვა და 20 გოლი გაიტანა.
„ძალიან ბედნიერი და ამაყი ვარ, რომ ინგლისის ნაკრებთან ჩემი მუშაობა გავახანგრძლივე. არავისთვისაა საიდუმლო, რომ აქ გატარებული ყოველი წუთი მიყვარდა, მოთამაშეებთან და სამწვრთნელო შტაბთან მუშაობა უდიდესი სიამოვნებაა და მოუთმენლად ველი მსოფლიო ჩემპიონატზე მათ გაძღოლას. ეს საოცარი შესაძლებლობაა და ყველაფერს გავაკეთებთ, რათა ქვეყანა ვაამაყოთ.
მარკის, ფეხბურთის ასოციაციის (FA) ყველა კოლეგისა და გულშემატკივრების მხრიდან იმდენი მხარდაჭერა მივიღე, რომ როცა შემომთავაზეს ამ საოცნებო პოზიციაზე დარჩენა, არც კი მიყოყმანია.
ევრო 2028 განსაკუთრებული ტურნირი იქნება და მწვრთნელისთვის არაფერია უკეთესი, ვიდრე საუკეთესოებთან კონკურენცია ყველაზე დიდ სცენაზე.“ - განაცხადა გერმანელმა სპეციალისტმა.
