ოფიციალურად: ვალვერდე სეზონის ბოლოს ატლეტიკს დატოვებს

ერნესტო ვალვერდემ ოფიციალურად განაცხადა, რომ მომავალ სეზონში ბილბაოს ატლეტიკის მთავარ მწვრთნელად მუშაობას აღარ გააგრძელებს.

ოფიციალურ ვიდეოში ესპანელმა მწვრთნელმა ასეთი განცხადება გააკეთა:

„გამარჯობა ყველას. დღეს აქ ვარ იმის სათქმელად, რომ მომავალ სეზონში ატლეტიკის მთავარი მწვრთნელი აღარ ვიქნები. ეს არის გადაწყვეტილება, რომლამდეც გარკვეული დროის განმავლობაში მივედი, რომელიც კლუბთან ერთად განვიხილე და მსურდა თქვენთვისაც გამეზიარებინა.

ამავე დროს, მნიშვნელოვანია აღინიშნოს, რომ წინ გვაქვს ათი უმნიშვნელოვანესი მატჩი, რომელიც ამ კვირას ბეტისთან შეხვედრით იწყება. ეს არის ათი თამაში, სადაც ჩვენი მიზნების მიღწევას ვეცდებით, სადაც ბევრი გვაქვს მოსაგები, სადაც ყველაფერს დავდებთ და, ეჭვგარეშეა, რომ შეგვიძლია გავიმარჯვოთ, თუ ერთად ვიქნებით."

ერნესტო ვალვერდე არის მწვრთნელი, რომელმაც ატლეტიკის ისტორიაში ყველაზე მეტი მატჩი ჩაატარა გუნდის სათავეში და ამ კვირას ბეტისის წინააღმდეგ 495-ე შეხვედრას მიაღწევს.

ეს არის მისი მესამე პერიოდი გუნდის ხელმძღვანელად (2003–05, 2013–17, 2022–26) და საერთო ჯამში მეათე წელი ატლეტიკის მწვრთნელის რანგში. ვალვერდემ გუნდს ორი ტიტული მოაგებინა: 2015/16 წლების ესპანეთის სუპერთასი და 2023/24 წლების კოპა დელ რეი.