ოფიციალურად: ვალვერდე სეზონის ბოლოს ბილბაოს დატოვებს

ერნესტო ვალვერდემ გამოაცხადა, რომ სეზონის დასრულების შემდეგ ატლეტიკის მთავარი მწვრთნელის პოსტს დატოვებს.

ესპანელმა სპეციალისტმა კლუბი მესამედ 2022 წელს ჩაიბარა. მანამდე ის გუნდს 2013-დან 2017 წლამდე და 2003-დან 2005 წლამდე წვრთნიდა. კიდევ უფრო იქამდე კი, სამი წლის განმავლობაში მთავარი მწვრთნელის ასისტენტის თანამდებობას იკავებდა.

„ეს არის გადაწყვეტილება, რომლამდეც დროთა განმავლობაში მივედი და ის კლუბთან შეთანხმებულია. დარჩენილია ათი მატჩი და ჩვენ გვაქვს მიზნები, რომელთა იმედიც უნდა გვქონდეს“, – განაცხადა 59 წლის ვალვერდემ.

ლა ლიგის 28 ტურის შემდეგ ატლეტიკი სატურნირო ცხრილში 35 ქულით მე-10 ადგილს იკავებს.