მარკუს რაშფორდი, შესაძლოა, მანჩესტერ იუნაიტედში დაბრუნდეს, თუ სეზონის ფინალურ ეტაპზე საკუთარ თამაშს არ გააუმჯობესებს. ვრცელდება ინფორმაცია, რომ ბარსელონა მის ალტერნატივად ჩელსის ვარსკვლავის, პედრო ნეტუს კანდიდატურასაც განიხილავს.
წითელმა ეშმაკებმა რაშფორდი გასულ ზაფხულს ლა ლიგის გრანდში იჯარით გაუშვეს. ხელშეკრულება გამოსყიდვის უფლებასაც ითვალისწინებს, რაც კატალონიელებს ზაფხულში 30 მილიონი ევრო (26 მლნ ფუნტი) დაუჯდებათ. მანჩესტერ იუნაიტედის აკადემიის აღზრდილმა ბარსელონაში წასვლამდე ექვსი თვე იჯარით ასტონ ვილაში გაატარა, რისი მიზეზიც რუბენ ამორიმთან კონფლიქტი გახდა (ეს უკანასკნელი მიმდინარე სეზონში გუნდიდან უკვე დაითხოვეს).
ბარსელონას ბანაკში ჩნდება ეჭვები, შეძლებს თუ არა კლუბი რაშფორდის გამოსყიდვასა და მისი მაღალი ხელფასის დაფარვას სხვა ტრანსფერების პარალელურად. ესპანური გამოცემა Mundo Deportivo წერს, რომ ბლაუგრანას სიაში ჩელსის შემტევი პედრო ნეტუც გამოჩნდა. კატალონიელებს ნეტუს უნივერსალურობა ხიბლავთ. პორტუგალიელმა ლონდონელთა მაისურით მიმდინარე სეზონში 48 მატჩში 10 გოლი და 7 საგოლე გადაცემა მიითვალა.
რაც შეეხება რაშფორდს, სტატისტიკურად ის კარგ სეზონს ატარებს, თუმცა კლუბი მისგან გადამწყვეტ შეხვედრებში მეტს ელის. კატალონიელებს ჯერ საბოლოო ნაბიჯი არ გადაუდგამთ და ინგლისელმა ფორვარდმა თავისი ადგილი სეზონის დარჩენილ ნაწილში უნდა დაიმსახუროს.
მიუხედავად ამისა, ფაბრიციო რომანო ამტკიცებს, რომ ფეხბურთელსა და ბარსელონას შორის პირადი კონტრაქტის დეტალები თითქმის შეთანხმებულია. მანჩესტერ იუნაიტედში კი ამ საკითხზე სიმშვიდეს ინარჩუნებენ.
რაშფორდის თაობაზე სიტუაცია ასეთია: მასსა და ბარსელონას შორის პირადი შეთანხმება თითქმის მიღწეულია. თუმცა, კლუბებს შორის ოფიციალური მოლაპარაკებები ბარსელონაში დაგეგმილი არჩევნების გამო ჯერ არ დაწყებულა. მანჩესტერ იუნაიტედის პოზიცია მკაფიოა: ან ბარსელონა იხდის 30 მილიონს, ან ფეხბურთელი ოლდ ტრაფორდზე ბრუნდება და კლუბი მას სხვა მსურველზე გაყიდის. იუნაიტედი მოლაპარაკებებსა და თანხის დაკლებას არ აპირებს
