ჰანსი ფლიკის ეპოქაში ბარსელონას მთავარ სავიზიტო ბარათად ახალგაზრდების ნდობა იქცა. სულ მალე კი შესაძლოა ლა მასიას კიდევ ერთ ტალანტს მიეცეს შანსი, პირველი გუნდის მაისურით თავი გამოიჩინოს.
კატალონიურ გრანდში ბოლო ერთი წლის განმავლობაში აკადემიის არაერთი აღზრდილი დაწინაურდა, მორიგი დებიუტი კი, სავარაუდოდ, ძალიან ახლოსაა. გამოცემა SPORT-ის ინფორმაციით, ახალგაზრდა მცველი ალვარო კორტესი მზადყოფნაშია და შესაძლოა სევილიას წინააღმდეგ მოედანზე ვიხილოთ. ცენტრალური მცველი ბოლო დროს სისტემატურად ხვდება განაცხადში, მათ შორის ისეთი მატჩებისთვის, როგორიცაა ატლეტიკ ბილბაოსთან და ნიუკასლ იუნაიტედთან დაპირისპირებები.
დებიუტი კარსაა მომდგარი?
კორტესისთვის შანსის მიცემა დიდწილად ბარსელონაში არსებულმა საკადრო პრობლემებმა დააჩქარა. სეზონის ამ გადამწყვეტ ეტაპზე დაცვის ხაზში ტრავმების ეპიდემიაა, რამაც ჰანსი ფლიკს არჩევანი მნიშვნელოვნად შეუზღუდა. კუნდესა და ბალდეს დაზიანებებს კრისტენსენის არყოფნაც დაემატა, რის გამოც გერმანელი სპეციალისტი იძულებულია გამოსავალი ისევ ლა მასიაში ეძებოს.
ალვარო კორტესი აკადემიის ერთ-ერთ ყველაზე იმედისმომცემ მოთამაშედ ითვლება. ის ფიზიკურად ძლიერია, კარგად თამაშობს მარცხენა ფეხით და ბურთის ფლობისას აუღელვებლობით გამოირჩევა.
თუ კორტესი მოედანზე გამოჩნდება, ის ფლიკის ხელში მეათე დებიუტანტი გახდება. გერმანელი მწვრთნელის დანიშვნის შემდეგ, აკადემიის უკვე ცხრა წევრს ჰქონდა პირველ გუნდში დებიუტი. სულ ცოტა ხნის წინ ოცნება ჩავი ესპარტს აუხდა, რომელმაც ნიუკასლთან ითამაშა, ახლა კი ყურადღების ცენტრში კორტესია.
ახალგაზრდა მცველი უკვე დიდი ხანია პირველ გუნდთან ერთად ვარჯიშობს და აშკარაა, რომ შემდეგი ნაბიჯისთვის მზადაა. გადაწყვეტს თუ არა ფლიკი მისთვის წუთების მიცემას სევილიასთან მატჩში, ამას მალე გავიგებთ, თუმცა რეალური შანსი ნამდვილად არსებობს.
