ბარსელონას პრეზიდენტობის კანდიდატმა, ვიქტორ ფონტმა, საარჩევნო კამპანია მხარდამჭერების წინაშე გამოსვლით დაასრულა.
ბარსელონას საპრეზიდენტო არჩევნები 15 მარტს გაიმართება. მასში მონაწილეობის უფლება აქვთ სრულწლოვან „სოსიოსებს“ (კლუბის წევრებს), რომელთაც მინიმუმ ერთწლიანი სტაჟი აქვთ.
„ორშაბათიდან ბარსელონას ისტორია შეიცვლება. კლუბი ყველას კუთვნილება გახდება, გაუღებს კარებს ყველა გულშემატკივარს და აღარასოდეს გაწყვეტს კავშირს არც ისტორიის უდიდეს მოთამაშესთან და არც კლუბის ლეგენდებთან, რომლებმაც ის ასეთი დიადი გახადეს.
ორშაბათიდან შეიცვლება ის ვითარება, როდესაც კლუბის წევრებს მხოლოდ პრეზიდენტის არჩევის უფლება აქვთ, სხვა საკითხებში კი ხმა თითქმის არ მიუწვდებათ. ჩვენ შევქმნით მართვის გამჭვირვალე სტრუქტურას. მთელ მსოფლიოს შეშურდება ჩვენი, მიუხედავად იმისა, გავიმარჯვებთ თუ არა მოედანზე.
მეტი, ვიდრე კლუბი
ბარსელონა იქნება ორგანიზაცია, სადაც კუთვნილების გრძნობა და პრინციპი „მეტი, ვიდრე კლუბი“ ურყევი რეალობა გახდება. იყვნენ ადამიანები, რომლებიც გვეუბნებოდნენ, რომ ვერ ხვდებოდნენ, რატომ ვხარჯავდით ამხელა ენერგიას და რატომ გვინდოდა ამ საარჩევნო მარათონში მონაწილეობა. ისინი გვარწმუნებდნენ, რომ კონკურენცია არ არსებობდა.
თუმცა საქმე, რომელსაც ბარსელონას ათასობით გულშემატკივარი იცავს, ცალკეულ სახელებსა და პიროვნებებზე მაღლა დგას. ისინი იბრძვიან პატიოსანი და გამჭვირვალე ბარსელონასთვის. ეს ეროვნული მასშტაბის საქმეა. ცვლილებების ტალღა უკვე მოვიდა და მისი შეჩერება შეუძლებელია“, – განაცხადა ფონტმა.
