"ფანტასტიკური იყო" - უოტფორდის მწვრთნელმა გოგლიჩიძე შეაქო

ინგლისის ჩემპიონშიფის 33-ე ტურში უოტფორდმა ვიკარიჯ როუდზე დერბი მიიღო და 2-0 დაამარცხა.

მასპინძელთა სასტარტო შემადგენლობაში იყო საბა გოგლიჩიძე, რომელმაც მოედანზე 86 წუთი გაატარა, გიორგი ჩაკვეტაძე კი მატჩში ტრავმირებული თანაგუნდელის ნაცვლად ჩაერთო და ბოლომდე ითამაშა.

უოტფორდმა შეხვედრა ლუკა კიერუმგორისა და მამადუ დუმბიას გოლებით მოიგო და ქულებით სწორედ დერბის გაუთანაბრდა. ქართველების გუნდი სატურნირო ცხრილში 48 ქულით მე-9 ადგილზეა და პრემიერ ლიგაში გადასასვლელი პლეიოფის ზონაში მყოფ ვრექსემს 3 ქულით ჩამორჩება.

მატჩის შემდეგ უოტფორდის მთავარმა მწვრთნელმა ედ სტილმა კომენტარი გააკეთა და საბა გოგლიჩიძის თამაში შეაქო:

„ის თუ როგორ გაუმკლავდნენ ჯეიმს აბანკვა და საბა გოგლიჩიძე მათ თავდამსხმელს [პატრიკ აგიემანგს], მართლაც ფანტასტიკური იყო. ის ჩემპიონშიპის ერთ-ერთი ყველაზე რთული მოწინააღმდეგეა და მათ ძალიან კარგი სამუშაო შეასრულეს.

როგორ აკონტროლებდნენ აბანკვა და გოგლიჩიძე დერბის შეტევას, მართლაც ფანტასტიკური იყო.“ - განაცხადა სტილმა, რომელმაც გუნდის მთავარი მწვრთნელის პოზიციაზე ხავი გრასია ცოტა ხნის წინ შეცვალა.

შეგახსენებთ, რომ ქართველი მცველი უოტფორდს ზამთრის სატრანსფერო ფანჯარაზე უდინეზედან იჯარის წესით შეურთდა და ინგლისურ გუნდში სეზონის ბოლომდე ითამაშებს.