ფიფა გეგმავს, 2026 წლის მსოფლიო ჩემპიონატზე უარი თქვას მოთამაშეთა ინდივიდუალურ გამოსვლებზე, რომელიც გასული ზაფხულის საკლუბო მსოფლიო ჩემპიონატზე გამოიყენეს.
ფიფამ ეს ფორმატი გასულ ზაფხულს, აშშ-ში გამართულ საკლუბო მსოფლიო ჩემპიონატზე გამოსცადა და ამით ამერიკულ სპორტულ ლიგებში გავრცელებული ტენდენცია გადაიღო.
კონცეფციის მიზანი თითოეული ფეხბურთელისთვის დამატებითი ყურადღების მიქცევაა, თუმცა ტრადიციული ფეხბურთის გულშემატკივრებისგან შერეული შეფასებები მიიღო.
წინასამატჩო პროტოკოლიდან ინდივიდუალური გამოსვლები, სავარაუდოდ, მოიხსნება, მიუხედავად იმისა, რომ ფიფა კვლავ განიხილავს მოთამაშეების მოედანზე გასვლის ახალ ფორმატს, რომელიც ტრადიციული გუნდური გამოსვლისგან განსხვავებული იქნება.
გასული ზაფხულის ტურნირზე გუნდებს შეეძლოთ თავად აერჩიათ, რა თანმიმდევრობით გავიდოდნენ მოთამაშეები მოედანზე, იმ პირობით, რომ გუნდის კაპიტანი ბოლოს გამოვიდოდა. იმ დროს ჩელსის ნახევარმცველმა რომეო ლავიამ განაცხადა, რომ „შოუბიზნესის“ დამატებითი ელემენტი მოსწონდა.
