ახალ წელს ჩემპიონთა ლიგა საერთო ფაზით ბოლო ორი ტურით გვიბრუნდება.
მე-7 ტური უკვე დღეს, 20 იანვარს დაიწყება და ტრადიციულად, პირველ სათამაშო დღეს 9 თამაშს ვიხილავთ.
ორი თამაში ნაადრევად არის გამოტანილი — სათამაშო დღეს კაირატ ალმატის და ბრიუგეს დაუპირისპირება გახსნის, შემდეგ კი მან სიტი ბოდო გლიმტს ესტუმრება. თუმცა, ყველაფერს თანმიმდევრულად მოვყვეთ.
19:30| კაირატი — ბრიუგე
ექვსი სათამაშო ტურის შემდეგ კაირატი ოფიციალურად ყველაზე სუსტი გუნდია 36 მონაწილეს შორის — ყაზახურ გუნდს ერთადერთი ქულა აქვს აღებული (პაფოსთან ფრე 0:0), დანარჩენი 5 თამაში კი საერთო ანგარიშით 4:15 დათმო და 24 საუკეთესოში მოხვედრის პრაქტიკულად ყველანაირი შანსი დაკარგული აქვს. ბრიუგეს რაც შეეხება, გუნდი 4 ქულით 31-ე პოზიციას იკავებს და ამ მატჩის მოგებით პლეი-ინის ზონაში მოხვედრის შანსებს მკვეთრად გაიუმჯობესებს.
სავარაუდო შემადგენლობები:
კაირატი: ანარბეკოვი; მრინსკი, მარტინოვიჩი, სოროკინი, მატა; გლეიზერი, ტაპალოვი; რიკარდინიო, გრომიკო, ჟორჟინიო; ფილიო
ბრიუგე: ვან დენ ჰეუველი; სეისი, მეჩელე, ორდონეზი, საბე; სტანკოვიჩი, ვანაკენი, ცოლისი; დიახონი, ვეტსელენი, ტრესოლდი.
21:45| ბოდო გლიმტი — მან სიტი
ნორვეგიული გუნდი ამ ეტაპზე 3 ქულით 32-ე ადგილს იკავებს და დიდი ალბათობით, სიტისთან მატჩის შემდეგ 24 საუკეთესოში მოხვედრის მათემატიკურ შანსებსაც დაკარგავს. თუ, რა თქმა უნდა, რაიმე სენსაცია არ დაფიქსირდა. თავის მხრივ სიტიმ 2025 წელი ლიგაზე განსხვავებული მატჩებით დახურა — ჯერ შინ ლევერკუზენთან დამარცხდა, თუმცა ბოლო მატჩში სტუმრად რეალს მოუგო, 13 ქულა დააგროვა და მე-4 ადგილს იკავებს. ამ ეტაპზე, გვარდიოლას გუნდს 8 საუკეთესოდან ამოვარდნა ნამდვილად არ ემუქრება.
სავარაუდო შემადგენლობები:
ბოდო გლიმტი: ჰაიკინი; სიოვოლდი, ბიორტუფტი, ალესამი, ბიორკანი; ბერგი, ფეტი, ევიენი; ჰაუგე, ჰოფი, ბლომბერგი
მან სიტი: დონარუმა; ლიუისი, ხუსანოვი, ალეინე, აკე; როდრი, რეინდერსი, ო'რაილი; შერკი, დოკუ, ჰალანდი.
23:55| კოპენჰაგენი — ნაპოლი
კონტეს გუნდები რო ლიგაზე სტაბილურად კარგი ასპარეზობით არასდროს გამოირჩეოდნენ, ამას იტალიის მოქმედი ჩემპიონი წელსაც ამტკიცებს. 6 ტურში ნაპოლის მხოლოდ 7 ქულა აქვს, თუმცა ეს 24 საუკეთესოში მოხვედრის შანსებს ხელს დიდად არ უშლის, ამ ეტაპზე გუნდი 23-ე პოზიციაზეა და ბოლო ორ ტურში დადებითი შედეგით პლეი-ინში გასვლას ნამდვილად შეძლებს. აბსოლუტურად იგივე მდგომარეობა აქვს კოპენჰაგენსაც — 7 ქულა და 24-ე ადგილი. ამიტომ, ცხრილის მიხედვით ეს პირდაპირი კონკურენტების და პოტენციური 6-ქულიანი მატჩიც გამოდის.
სავარაუდო შემადგენლობები:
კოპენჰაგენი: კოტარსკი; ზაგუე, პერეირა, სუზუკი, ლოპესი; დილეინი, მადსენი; ელიონუსი, ლარსონი, აჩოური; დადასონი
ნაპოლი: მილინკოვიჩ-სავიჩი; ბეუკემა, ჟეზუსი, ბონჯორნო; დი ლორენცო, ლობოტკა, მაკტომინეი, სპინაცოლა; ვერგარა, ლანგი; ჰოილუნდი.
23:55| ინტერი — არსენალი
შესაძლოა ტურის ცენტრალური მატჩი სტადიონ ჯუზეპე მეაცაზე გაიმართება. ინტერმა ეს ლიგა ბრწყინვალედ, 4-დან 4 მოგებით დაიწყო, თუმცა ფეხი ბოლო ორ ტურში დაუცდა და ორივე თამაში წააგო. სამართლიანობა მოითხოვს აღვნიშნოთ, რომ ორივე მატჩში გუნდს მრისხანე მეტოქე ჰყავდა (ატლეტიკო და ლივერპული). ამოსუნთქვის საშუალება კივუს გუნდს არც ახლა ექნება დიდად, რადგან სტუმრად ამ ჩემპიონთა ლიგის ერთადერთი უდანაკარგოდ მიმავალი გუნდი ჩამოდის, რომელსაც 8 საუკეთესოში მოხვედრა ჯერ ფორმალურად, ამ ტურის შემდეგ კი შესაძლოა მათემატიკურადაც გაფორმებული ჰქონდეს.
სავარაუდო შემადგენლობები:
ინტერი: ზომერი; ბასტონი, აკანჯი, აჩერბი; დიმარკო, მხითარიანი, ჟელინსკი, ბარელა, ენრიკე; მარტინესი, ტურამი
არსენალი: რაია; უაითი, სალიბა, გაბრიელი, ლიუის-სკელი; სუბიმენდი, რაისი, ოდეგორი; საკა, ტროსარი, ჟესუსი.
23:55| ოლიმპიაკოსი — ლევერკუზენი
კასპერ ჰიულმანის ლევერკუზენი წელს ამერიკული ატრაქციონივით არის — კარგ შედეგს ცუდით ანაცვლებს და ძალიან არასტაბილური და არაპროგნოზირებადია. სიტის გასვლზე უგებს, მაგრამ პსვ-ს სახლში ვერა. ეს ყველაფერი კი 6 მატჩში მოპოვებულ 9 ქულაში და მე-20 ადგილში გადაიზარდა, რაც ჯერჯერობით არაფრის გარანტი არ არის და გუნდს საბერძნეთიდან დადებითი შედეგით წამოსვლა სასიცოცხლოდ ესაჭიროება. ოლიმპიაკოსის მდგომარეობა მძიმეა - გუნდს მხოლოდ 5 ქულა აქვს და თავისი ერთადერთი გამარჯვება ბოლო ტურში, აუთსაიდერი კაირატის წინააღმდეგ მოიპოვა. ბერძნები 29-ე ადგილზე არიან და 24 საუკეთესოში მოხვედრის იმედი ჯერ ცოცხალია.
სავარაუდო შემადგენლობები:
ოლიმპიაკოსი: ტზოლაკისი; ორტეგა, რეტსოსი, ბიანკონე, როდინელი; მუზაკიტისი, ჰეზე; მარტინსი, ჩიკინიო, პოდენსე; ტარემი
ლევერკუზენი: ბლასვიჩი; ქუანსა, ანდრიხი, ბადე; არტური, ფერნანდესი, გარსია, გრიმალდო; ტილმანი, პოკუ; შიკი.
23:55| რეალი — მონაკო
სიტისთან ბოლო ჩემპიონთალიგური მატჩის შემდეგ სანტიაგო ბერნაბეუზე ბევრი რამ შეიცვალა — მწვრთნელი, ფანების გუნდისადმი დამოკიდებულება და გასახდელში ატმოსფეროც. ალვარო არბელოას ლიგაზე დებიუტი მონაკოს წინააღმდეგ შედგება, რომელსაც 6 ტურში 9 ქულა აქვს და ქულები თავადაც ძალიან სჭირდება. თუმცა, მადრიდელებს ბოლო 3 თამაშში ლიგაზე 2 წაგება აქვთ და ამ ეტაპზე 8 საუკეთესოში მხოლოდ მე-7 ადგილს იკავებენ, ამიტომ ბოლო ორ ტურში დადებითი შედეგები სასიცოცხლოდ მნიშვნელოვანია, თუ სამეფო კლუბს შარშანდელივით 1/16 ფინალში არ სურს მონაწილეობის მიღება და კალენდრის კიდევ 2 მატჩით გადატვირთვა.
სავარაუდო შემადგენლობები:
რეალი: კურტუა; ვალვერდე, ასენსიო, ჰაუსენი; ფრან გარსია; ჩუამენი, გიულერი, ბელინგემი; ვინისიუსი, მასტანტუონო, მბაპე
მონაკო: კონი; ვანდერსონი, კერერი, დაიერი, ენრიკე; აკლიუჩე, ტეზე, ზაკარია; გოლოვინი; ბალოგუნი, ბიერეტი.
23:55| სპორტინგი — პსჟ
წესით ახლა ქართულ, ქოჩორა-კვარას დერბიზე უნდა ვლაპარაკობდეთ და ფორმალურად ასეც არის, თუმცა გიოს ლისაბონში სათამაშო დრო პრაქტიკულად არ ეძლევა და ნაკლებად სავარაუდოა, ასეთ მნიშვნელოვან მატჩში და ასეთ მეტოქესთან მისცეს მწვრთნელმა შანსი. თუმცა, იმედი ხომ ბოლოს კვდება... 6 ტურის შემდეგ ლისაბონელები 10 ქულით მე-14 პოზიციაზე არიან და 24 საუკეთესოში ადგილი ამ ეტაპზე დამაჯერებლად უკავიათ, პსჟ კი 13 ქულით სულაც მე-3 პოზიციაზეა და მის 8-დან ამოვარდნას ჯერჯერობით არაფერი ემუქრება.
სავარაუდო შემადგენლობები:
სპორტინგი: სილვა; ფრესნედა, მათეუსი, ინასიო, ვაგიანიდისი; სიმოესი, მორიტა; არაუხო, ტრინკაუ, კატამო; სუარესი
პსჟ: შევალიე; ზაირ-ემერი, მარკინიოსი, პაჩო, მენდეში; ვიტინია, მაიულუ, რუისი; დუე, კვარაცხელია, დემბელე.
23:55| ტოტენჰემი — დორტმუნდი
კიდევ ერთი უშუალო კონკურენტების დაპირისპირება, რომლებიც 24 საუკეთესოში ადგილს დამაჯერებლად იკავებენ, თუმცა 8-ში მოხვედრაზეც, ბუნებრივია, უარს არ იტყოდნენ. 11-11 ქულით ეს ორი გუნდი მე-10 და მე-11 პოზიციას იყოფენ და აქ გამარჯვება ერთი პოტენციური კონკურენტის ჩამოშორებას ნიშნავს. ტოტენჰემისთვის გამარჯვების აუცილებლობას ის ზრდის, რომ მწვრთნელი თომას ფრანკის სკამი დიდი ხანია მერყეობს და კიდევ ერთი საშინაო მარცხი ხელმძღვანელობამ მას შესაძლოა აღარ აპატიოს.
სავარაუდო შემადგენლობები:
ტოტენჰემი: ვიკარიო; პორო, რომერო, დანსო, სპენსი; ბერგვალი, გრეი; ოდობერტი, სიმონსი, კოლო მუანი; სოლანკე
ბორუსია: კობელი; შლოტერბეკი, ჯანი, ანტონი; კოუტო, ნმეჩა, ბელინგემი, რიერსონი; ადეიემი, ბრანდტი; გირასი.
23:55| ვილიარეალი — აიაქსი
გიორგი მიქაუტაძე რომ ყოფილ გუნდს ხვდება, სადაც შანსი პრაქტიკულად არ მიეცა და მწვრთნელმა დაიჩაგრა, ეს თავადაც იცის და ამის მეტი ამ თამაშზე ბევრს ვერაფერს იტყვი, რადგან ჩემპიონთა ლიგის ფსკერზე მყოფი ორი გუნდის დაპირისპირებაა. თუ ლა ლიგაში ვილიარეალი მესამე ადგილზეა და ჩემპიონობისთვის მებრძოლადაც შეიძლება ჩავთვალოთ, ჩემპიონთა ლიგაზე მარსელინომ აშკარად თავიდანვე ჩაიქნია ხელი, რაც 6 ტურში მოპოვებულ მხოლოდ 1 ქულაში გადაიზარდა. ბევრად მეტი არც აიაქსს აქვს, რომელიც წინა ტურამდე ერთადერთი უქულო გუნდი იყო, თუმცა ბოლო მატჩში სტუმრად ყარაბაღს მოუგო და სადებიუტო 3 ქულაც ჩაიწერა აქტივში. რამდენად აქვს ამ მატჩს მიქაუტაძის გარდა სხვა რაიმე მოტივაცია — თავად განსაჯეთ, რადგან 24 საუკეთესოში მოხვედრის შანსი ორივე გუნდს ძალიან მცირე აქვს.
სავარაუდო შემადგენლობები:
ვილიარეალი: ჯუნიორი; ნავარო, მარინი, ვეიგა, პედრასა; მოლეირო, პარეხო, კომესანა, ბუჩანანი; პეპე, მიქაუტაძე
აიაქსი: იაროში; გუაეი, იტაკურა, ბოუვმანი, როსა; კლაასენი, რეგეერი, სტეური; მორო, გოდტსი, დოლბერგი.
