ჟოზე მოურინიომ ახალ დოკუმენტურ ფილმში აღიარა, რომ 2013 წელს მანჩესტერ იუნაიტედთან წინასწარი შეთანხმება ჰქონდა და ოლდ ტრაფორდზე სერ ალექს ფერგიუსონის შემცვლელად გადასვლაზე კონტრაქტიც კი გააფორმა, თუმცა ბოლო მომენტში გადაიფიქრა და ჩელსიში დაბრუნება არჩია.
თავად სერ ალექსი იხსენებს, რომ პორტუგალიელმა სპეციალისტმა ცრემლიანმა დაურეკა და აუხსნა, რომ 2013 წელს იუნაიტედის ჩაბარებას ვერ შეძლებდა.
აღნიშნულმა თემამ საფეხბურთო სამყაროში დიდი დისკუსია გამოიწვია. რა მოხდებოდა პრემიერ ლიგაში მოურინიო წითელ ეშმაკებს სამი წლით ადრე რომ ჩადგომოდა სათავეში?
დადებითი მხარეები - რატომ შეიძლებოდა ყოფილიყო ეს წარმატებული?
დავით მოიესისგან განსხვავებით, რომელსაც სერ ალექსის მემკვიდრეობა ძალიან მძიმე ტვირთად დააწვა, ჟოზე მოურინიო სატრანსფერო ბაზარზე უფრო ავტორიტეტული ფიგურა იყო. იმ პერიოდში იუნაიტედს ტიაგო ალკანტარასთან შეთანხმება ჰქონდა, თუმცა გარიგება ჩაიშალა და კლუბმა ზაფხული ფელაინის ძებნაში გაატარა. მოურინიოს მოსვლის შემთხვევაში, კლუბი ძირითადი სამიზნეების შენარჩუნებას და შემადგენლობის ეფექტურად განახლებას შეძლებდა.
ფერგიუსონის წასვლის შემდეგ კლუბს სჭირდებოდა მწვრთნელი, რომელსაც საკმარისი ქარიზმა ექნებოდა ლეგენდარული შოტლანდიელის ჩრდილიდან გამოსასვლელად. პიკში მყოფი მოურინიო (რომელმაც მანამდე რეალში ლა ლიგაში 100 ქულა დააგროვა) სწორედ ისეთი ფიგურა იყო, ვინც ოლდ ტრაფორდზე გამარჯვებულის მენტალიტეტს შეინარჩუნებდა.
უარყოფითი მხარეები: რატომ შეიძლებოდა ეს გეგმა ჩავარდნილიყო?
2012-2013 წლებში მადრიდის რეალში მუშაობის დასასრულს მოურინიო უკვე გამოფიტული იყო. იკერ კასილასთან კონფლიქტი და დრამები აჩვენებდა იმავე ტენდენციას, რაც მოგვიანებით ჩელსისა და იუნაიტედშიც განმეორდა - მწვრთნელის კლასიკურ მეორე სეზონის წარმატებას მესამე სეზონში კოლაფსი მოსდევდა.
ზოგიერთი კრიტიკოსი მიიჩნევს, რომ მოურინიოს მცდელობა, კლუბი საკუთარ იმიჯს მოერგო, იუნაიტედის ტრადიციებსა და ისტორიას ხშირად ეწინააღმდეგებოდა, რისი დასტურიც 2016-2018 წლები გამოდგა.
