ვეტერანმა იტალიელმა მცველმა, მარკო მატერაციმ Gazzetta Dello Sport-თან საუბრისას ფეხბურთის ისტორიაში ერთ-ერთი ყველაზე ცნობილი სკანდალი, ზინედინ ზიდანის მხრიდან თავით მიყენებული დარტყმა გაიხსენა.
ამ თემის ხელახლა წამოწევა ტენერიფეს მოთამაშის, ხესუს დე მიგელის გარშემო დატრიალებულმა უმძიმესმა ტრაგედიამ განაპირობა. იტალიელმა ეს ორი შემთხვევა ერთმანეთს შეადარა და აღნიშნა, რომ ესპანელი ფეხბურთელის გარდაცვალების შემდეგ, ღმერთს მადლობა გადაუხადა, რადგან წლების წინ თავად გადარჩა.
"იმ მეკარის შემთხვევაში, საუბარია გაუფრთხილებლობით მკვლელობის ბრალდებაზე, რაც მატჩის დროს მომხდარ ეპიზოდს უკავშირდება... ნეტავ, მე რომ დამმართნოდა იგივე, რა მოხდებოდა?" - სვამს კითხვას მატერაცი.
მარკოს თქმით, მას ფრანგთან შერიგების პრობლემა არასდროს ჰქონია და ამის შანსი 2010 წელს ნამდვილად არსებობდა. მილანისა და მადრიდის რეალის მატჩის წინ, ის სასტუმროში ჟოზე მოურინიოს დაემშვიდობა, რა დროსაც ზიდანი შენიშნა. იტალიელის თქმით, ზინედინმა შეყოყმანდა და უკან გაბრუნებაც კი იფიქრა, თუმცა მარკო თავად მივიდა, ხელი ჩამოართვა და უთხრა, რომ უხაროდა მათი შეხვედრა იქ, სადაც არავინ უყურებდათ. ზიდანმა უპასუხა, რომ მსგავსი რამეები ხდება და ყველაფერი წარსულში დარჩა, თუმცა მოგვიანებით საკუთარი სიტყვები უკან წაიღო, რასაც მატერაცი ძალიან სამწუხარო ფაქტს უწოდებს.
