რა პრობლემა შეექმნათ უნგრელებს თბილისურ მატჩამდე?

14 ნოემბერს, 21:00 საათზე, თბილისში, მიხეილ მესხის სახელობის სტადიონზე საქართველო უნგრეთს უმასპინძლებს.

ერთა ლიგის B დივიზიონის ეს მატჩი ორივე გუნდისთვის უაღრესად მნიშვნელოვანია, თუმცა სტუმრებს სერიოზული დანაკლისი აქვთ, უეფას დისციპლინური კომიტეტის გადაწყვეტილებით, უნგრელი გულშემატკივრები სტადიონზე დასწრებას ვერ შეძლებენ.

უნგრეთის ნაკრების ფეხბურთელებმა, როლანდ შალაიმ და იოზეფ ურბლიკმა, M4 Sport-თან საუბრისას აღნიშნეს, რომ ფანების არყოფნა გუნდისთვის დიდი დარტყმაა.

„გულშემატკივრების არყოფნა ძალიან მტკივნეულია, რადგან, მე-12 მოთამაშესავით, ისინი ყოველთვის ჩვენ გვერდით არიან, თუმცა პროფესიონალი ფეხბურთელები ვართ და თავის გასამართლებელი მიზეზები არ უნდა ვეძებოთ,“ - განაცხადა შალაიმ.

მისი თქმით, ფანების არყოფნის და სხვა სასაათო სარტყელის მიუხედავად, გუნდმა მიზანს უნდა მიაღწიოს და კარგი თამაშით გაიმარჯვოს. შალაიმ გუნდის კაპიტანზე, დომინიკ სობოსლაიზეც ისაუბრა და აღნიშნა, რომ მისი აზრით, ის თამაშს შეძლებს.

მსგავსი განწყობა აქვს იოზეფ ურბლიკსაც: „სულ სხვა შეხვედრისთვის ვემზადებით. დიდი დარტყმაა, ჩვენი ქომაგები სტადიონზე რომ არ იქნებიან, რადგან კარგად ვიცით, მათ რა საოცარი ატმოსფეროს შექმნა შეუძლიათ, თუმცა ამას უნდა გავუმკლავდეთ და შინ სამი ქულით დავბრუნდეთ“.

ახლა სატურნირო მდგომარეობა ასეთია: B დივიზიონის მეორე ჯგუფს 8 ქულით ჩრდილოეთ ირლანდია ლიდერობს, უნგრეთი 7 ქულით მეორეა, უკრაინა 4 ქულით  მესამე. საქართველოს ნაკრებს კი ოთხ მატჩში ჯერ გამარჯვება არ მოუპოვებია, არც გოლი გაუტანია და 2 ქულით ბოლო, მეოთხე პოზიციას იკავებს.