რატომ არ იღებენ ინგლისის მოთამაშეები სანაკრებო ჰონორარს?

2026 წლის ჩრდილოეთ ამერიკის მსოფლიო ჩემპიონატის დაწყებამდე, რომელიც ფეხბურთის ისტორიაში ყველაზე შემოსავლიანი ტურნირი იქნება (FIFA სარეკორდო 650 მილიონ ფუნტ სტერლინგს გაანაწილებს), გამოცემა GiveMeSport-მა ინგლისის ნაკრების ფეხბურთელების ანაზღაურების სტრუქტურა დეტალურად მიმოიხილა.

მიუხედავად იმისა, რომ ნაკრების წევრები საკლუბო დონეზე ასტრონომიულ თანხებს გამოიმუშავებენ, ეროვნულ გუნდში ანაზღაურების სისტემა სრულიად განსხვავებულ პრინციპებს ეფუძნება.

ინგლისის ფეხბურთის ასოციაციის გადაწყვეტილებით, ფეხბურთელები ნაკრებში ჩატარებულ თითოეულ შეხვედრაში სიმბოლურ საბაზისო ჰონორარს - დაახლოებით 2 000 ფუნტ სტერლინგს იღებენ. ეს იმიტომ, რომ ქვეყნის წარდგენა უპირველესად ღირსების საქმედ მიიჩნევა და არა ფულის შოვნის წყაროდ.

რეალური ფინანსური სარგებელი დამოკიდებულია გუნდის შედეგზე. თუ თომას ტუხელის გაწვრთნილი გუნდი 19 ივლისს ნიუ-ჯერსიში მსოფლიო თასს აღმართავს, თითოეული მოთამაშე 500 000 ფუნტ სტერლინგს მიიღებს ბონუსის სახით. ანალოგიური ბონუსი იყო დაწესებული 2022 წლის კატარის მუნდიალზეც, მაშინ როცა 2018 წელს რუსეთში ეს ციფრი 215 000 ფუნტს შეადგენდა.

ისტორიული გამარჯვების შემთხვევაში, მრავალმილიონიანი პირადი ბონუსი აქვს განაღდებული ნაკრების მთავარ მწვრთნელს, თომას ტუხელსაც.

მსოფლიო ჩემპიონატი ფეხბურთელებისთვის უზარმაზარ კომერციულ პლატფორმას წარმოადგენს. სატურნირო განაცხადის გამოქვეყნებისთანავე, ისეთი ვარსკვლავების საბაზრო ღირებულება და სარეკლამო პოტენციალი, როგორებიც არიან ჰარი კეინი, ჯუდ ბელინგემი და დეკლან რაისი, მყისიერად იზრდება. ხშირად, წარმატებული სატურნირო პროგრესით გამოწვეული ახალი სპონსორული კონტრაქტები ფეხბურთელებისთვის ბევრად უფრო შემოსავლიანია, ვიდრე უშუალოდ ასოციაციის მიერ დაპირებული პრემიები.

ეს არის ინგლისის ნაკრების ფინანსური მოდელის ყველაზე ნაკლებად ცნობილი და გამორჩეული მხარე: 2007 წლის შემდეგ, ინგლისის მამაკაცთა ნაკრების არცერთ ფეხბურთელს სამატჩო ჰონორარი საკუთარ ჯიბეში არ ჩაუდვია.

ეს ტრადიცია თითქმის ორი ათეული წლის წინ დააფუძნა მოთამაშეთა კომიტეტმა, რომელშიც დევიდ ბექჰემი, გარი ნევილი და ჯონ ტერი შედიოდნენ. მას შემდეგ, ყველა მოთამაშე თავის გამომუშავებულ თანხას სრულად რიცხავს ორგანიზაციაში England Footballers' Foundation (EFF). 2018 წლისთვის ამ ფონდის მეშვეობით სხვადასხვა ორგანიზაციებში (UNICEF, Cancer Research UK, The Bobby Moore Fund და სხვა) 5 მილიონ ფუნტზე მეტი შევიდა, და ეს ტრადიცია ამ ზაფხულს ჩრდილოეთ ამერიკაშიც გაგრძელდება.