რეალ მადრიდის ლეგენდა ლუიშ ფიგუ კილიან მბაპეს ტრავმასთან დაკავშირებით თამამ რჩევას აძლევს
2025-26 წლების სეზონში კილიან მბაპე რეალ მადრიდის შეუცვლელ მოთამაშედ ჩამოყალიბდა. 38 გატანილი გოლით მან გუნდის მთავარი მეგოლის სტატუსი განიმტკიცა, თუმცა ფრანგის მარცხენა მუხლის ტრავმამ კლუბში დიდი გაურკვევლობა გააჩინა. ოსასუნასთან მატჩის გამოტოვების შემდეგ მბაპეს მუხლის იოგების დაჭიმვა დაუდგინდა, თუმცა გავრცელებული ინფორმაციით, საქმე უფრო რთულადაა და საუბარია უკანა ჯვარედინი იოგის ნაწილობრივ გაწყვეტაზე, რამაც შესაძლოა ფეხბურთელი მოედანს იმაზე დიდხანს ჩამოაშოროს, ვიდრე მოელოდნენ.
მიუხედავად მძიმე პროგნოზებისა, სამეფო კლუბში ოპტიმიზმს ინარჩუნებენ და ელიან, რომ მბაპე მანჩესტერ სიტისთან საპასუხო მატჩისთვის მზად იქნება. სწორედ ამ ფონზე გადაწყვიტა ლუიშ ფიგუმ 27 წლის ვარსკვლავისთვის რჩევის მიცემა, რომელიც Mundo Deportivo-მ გამოაქვეყნა.
მბაპეს ტრავმის შემთხვევაში მთავარია, თავად ფეხბურთელმა რას გრძნობს. ღირს თუ არა რისკზე წასვლა და ხომ არ მოჰყვება ამას უფრო მძიმე შედეგები... ჩემს შემთხვევაში, რამდენჯერმე საკუთარ თავს ძალა დავატანე, რათა მოედანზე ვყოფილიყავი და ეს კარგად არ დასრულებულა. საბოლოო ჯამში, მსგავსი მსხვერპლი ყოველთვის იჩენს თავს და თავის ფასს მოითხოვს
მას შემდეგ, რაც როდრიგომ ჯვარედინი იოგებისა და მენისკის ტრავმის გამო სეზონი ნაადრევად დაასრულა, გულშემატკივრები მბაპეს მიმართ მაქსიმალურ სიფრთხილეს ითხოვენ. მართალია, გუნდის მწვრთნელმა ალვარო არბელოამ იმედი გამოთქვა, რომ კილიანი მარტის შუა რიცხვებში დაბრუნდება, მაგრამ არსებობს შიში, რომ რეციდივის შემთხვევაში მან შესაძლოა 2026 წლის მსოფლიო ჩემპიონატი და მომავალი სეზონიც კი გამოტოვოს.
ამჟამად რეალ მადრიდი სერიოზული საკადრო პრობლემების წინაშე დგას: დანი კარვახალი, ედერ მილიტაო და ახლა უკვე როდრიგო გუნდს ვერ ეხმარებიან. ბოლო წლებში ტიბო კურტუასა და დავიდ ალაბას მსგავსი მძიმე ტრავმების სიხშირემ ფანებს შორის კლუბის სამედიცინო პერსონალის მიმართ დიდი უნდობლობა გააჩინა.
