რეკორდების სია - კვარაცხელია და პსჟ გინესის რეკორდების წიგნში მოხვდნენ

არაერთი ინდივიდუალური და გუნდური მიღწევის წყალობით, პარი სენ-ჟერმენი მსოფლიო რეკორდსმენთა რიგებს შეუერთდა.

პარიზულმა კლუბმა გინესის მსოფლიო რეკორდის ჯამში 12 სერტიფიკატი მიიღო, რომლებიც საფრანგეთისა და ევროპის ფეხბურთში დამყარებულ რეკორდებს ადასტურებს.

ლიგა 1

1986-დან 2026 წლამდე მოპოვებული 14 ჩემპიონობით პარი სენ-ჟერმენი საფრანგეთის ყველაზე ტიტულოვანი კლუბია. გარდა ამისა, 2015/16 წლების სეზონში დაგროვებული 96 ქულა ლიგა 1-ის რეკორდია.

იმავე პერიოდში პარიზელებმა კიდევ ერთი რეკორდი დაამყარეს - 2015 წლის 15 მარტიდან 2016 წლის 20 თებერვლამდე ზედიზედ 36 მატჩში არ დამარცხებულან.

კიდევ ერთი გამორჩეული მიღწევა 2018/19 წლების სეზონს უკავშირდება, როდესაც პარი სენ-ჟერმენმა 2018 წლის 12 აგვისტოდან 24 ნოემბრამდე ზედიზედ 14 შეხვედრა მოიგო.

შედარებით ახლო წარსულში პარიზულმა კლუბმა საფრანგეთის ჩემპიონატში სტუმრად წაუგებელი მატჩების ახალი რეკორდიც დაამყარა. 2023 წლის 26 თებერვლიდან 2025 წლის 3 მაისამდე პსჟ-მა მეტოქის მოედანზე ზედიზედ 39 შეხვედრა წაუგებლად ჩაატარა.

ჩემპიონთა ლიგა

პარიზული კლუბის რეკორდული მიღწევები ევროპულ ასპარეზზეც ვრცელდება.

2025 წლის 31 მაისს პარი სენ-ჟერმენმა მიუნხენში გამართულ ჩემპიონთა ლიგის ფინალში მილანის ინტერი 5:0 დაამარცხა და ტურნირის ისტორიაში ფინალის ყველაზე დიდი სხვაობით მოგების რეკორდი დაამყარა.

ამავე შეხვედრაში დეზირე დუემ ინდივიდუალური რეკორდი დააფიქსირა - ჩემპიონთა ლიგის ფინალში 3 გოლში მიიღო მონაწილეობა (2 გოლი და 1 საგოლე გადაცემა).

2025/26 წლების სეზონში პარი სენ-ჟერმენმა ჩემპიონთა ლიგაზე 45 გოლი გაიტანა, რაც ტურნირის ერთ სეზონში დაფიქსირებული რეკორდული მაჩვენებელია.

ინდივიდუალური მიღწევებით პარიზული კლუბის კიდევ 2 ფეხბურთელი გამოირჩა.

ვიტინიამ ჩემპიონთა ლიგის ერთ სეზონში 1602 გადაცემა შეასრულა და ახალი რეკორდი დაამყარა.

ხვიჩა კვარაცხელიამ კი ჩემპიონთა ლიგის პლეი-ოფის ზედიზედ 7 შეხვედრაში მინიმუმ 1 გოლში მიიღო მონაწილეობა, რაც ასევე ტურნირის რეკორდია. ქართველმა ფეხბურთელმა ეს შედეგი 2026 წლის 25 თებერვლიდან 6 მაისამდე პერიოდში დააფიქსირა.

ინდივიდუალური რეკორდები

პარი სენ-ჟერმენის ფეხბურთელებს რამდენიმე რეკორდი საფრანგეთის ლიგა 1-შიც ეკუთვნით.

მარკინიოსმა 2014-დან 2026 წლამდე საფრანგეთის ჩემპიონატი 11-ჯერ მოიგო, რაც ლიგა 1-ის ისტორიაში ერთი ფეხბურთელის მიერ მოპოვებული ყველაზე მეტი საჩემპიონო ტიტულია.

ფაბიან რუისს კი საფრანგეთის ჩემპიონატში ინდივიდუალური წაუგებელი სერიის რეკორდი ეკუთვნის. ესპანელმა ნახევარმცველმა 2023 წლის 7 მაისიდან 2025 წლის 25 აპრილამდე პსჟ-ის შემადგენლობაში ზედიზედ 51 შეხვედრა ჩაატარა მარცხის გარეშე.

ამ 12 მიღწევის წყალობით პარი სენ-ჟერმენი და მისი ფეხბურთელები ოფიციალურად გინესის მსოფლიო რეკორდების წიგნში მოხვდნენ.