მბაპეები, ბელინგემები, კვარაცხელიები - ფეხბურთის ყველაზე ძვირადღირებული ძმები

გერმანულმა ანალიტიკურმა პორტალმა Transfermarkt-მა მსოფლიო ფეხბურთში მოქმედი ძმების საინტერესო რეიტინგი შეადგინა.

სიაში ის დუეტები მოხვდნენ, რომელთა ჯამური საბაზრო ღირებულება ამჟამად ყველაზე მაღალია. 

საამაყოა, რომ ტოპ ათეულში მეოთხე პოზიციას ხვიჩა და თორნიკე კვარაცხელიები იკავებენ. პარი სენ-ჟერმენის ვარსკვლავისა და თბილისის დინამოს ახალგაზრდა ტალანტის საერთო ფასი 141.5 მილიონ ევროს შეადგენს.

რეიტინგს კილიან და ეთან მბაპეები ლიდერობენ (ჯამში 212 მილიონი ევრო). მადრიდის რეალის ვარსკვლავი 200 მილიონად ფასდება, ლილის გარემარბი კი 12 მილიონად. 

მეორე ადგილზე ინგლისელი ბელინგემები არიან 200 მილიონი ევროთი. მადრიდის რეალის 23 წლის შემტევის ღირებულება 160 მილიონია, დორტმუნდის ბორუსიაში მოთამაშე ჯოუბის ფასი კი 40 მილიონს შეადგენს. 

მესამე პოზიციაზე 150 მილიონით დეზირე და გელა დუე განთავსდნენ.

ქართველი ძმების შესახებ პორტალი საგანგებოდ წერს. მათი შეფასებით, 140 მილიონად ღირებული 25 წლის ხვიჩა კვარაცხელია მსოფლიოს ერთ-ერთ ყველაზე საშიშ გარემარბად იქცა და პსჟ-ში გადასვლის შემდეგ ფეხბურთის ელიტაში საბოლოოდ დამკვიდრდა. ტექსტში საუბარია მის ახლანდელ მძიმე ტრავმაზეც, რომელმაც მთელი მსოფლიოს გულშემატკივრებს დასწყვიტა გული. გამოცემა ვარაუდობს, რომ ფეხბურთში ისტორია შესაძლოა გამეორდეს, რადგან ხვიჩას 16 წლის ძმა, თორნიკე კვარაცხელია (1.5 მილიონი ევრო) თბილისის დინამოში უკვე შესანიშნავად წარმოაჩენს თავს და წამყვანი ევროპული კლუბების ყურადღებასაც იქცევს.

რაც შეეხება მიმდინარე სეზონის სტატისტიკას, ხვიჩამ პარიზული კლუბის მაისურით ყველა ტურნირზე 11 შეხვედრა ჩაატარა, 2 გოლი გაიტანა და 1 შედეგიანი გადაცემა შეასრულა. თორნიკე კვარაცხელიამ კი დინამოს რიგებში 22 მატჩში მიიღო მონაწილეობა და 2 გოლთან ერთად 2 ასისტიც მიითვალა, აქედან შედეგიანი მოქმედებები ძირითადად ახალგაზრდულ ჩემპიონთა ლიგაზე დააფიქსირა.