გიორგი კვერნაძე მიმდინარე სეზონში საოცარ ფორმაშია და ფროზინონეს ნამდვილი ლიდერია.
ქართველ თავდამსხმელზე იტალიურმა გამოცემა Tuttonapoli-მ საინტერესო სტატია გამოაქვეყნა, სადაც მის პროგრესსა და საქართველოს ნაკრებში მოსალოდნელ როლზე ამახვილებს ყურადღებას.
გამოცემა წერს, რომ კვერნაძე პრეზიდენტ სტირპეს გუნდში მეოთხე სეზონს ატარებს და კარიერის საუკეთესო პერიოდი უდგას. ხვიჩა კვარაცხელიასგან განსხვავებით, რომელმაც სერია A-ში გამოჩენისთანავე მიაღწია წარმატებას, გიორგის პროგრესი ეტაპობრივი იყო და განვითარებისთვის სერია B-ში თამაშიც მოუწია.
„კვერნაძეს ნაპოლის ყოფილი ვარსკვლავის, ამჟამად კი პარი სენ-ჟერმენის ფეხბურთელის (კვარაცხელიას) პოზიცია აქვს. კვარაცხელია ამჟამად ტრავმირებულია და ეს გარემოება შესაძლოა უახლოეს კვირებში საქართველოს ნაკრებში იერარქიის განსაზღვრისას მნიშვნელოვანი აღმოჩნდეს“, - აღნიშნავს Tuttonapoli.
მედიის ვარაუდით, ნოემბერში კვერნაძეს ხვიჩას სათანადოდ ჩანაცვლების შესაძლებლობა ექნება, თუმცა გრძელვადიან პერსპექტივაში, თუ მას კვარას დაბრუნების შემდეგაც სურს ძირითადში მოხვედრა, ფროზინონეს დატოვება მოუწევს.
