როსენიორის მძიმე, მაგრამ წარმატებული დებიუტი ლიგაზე — ჩელსიმ პაფოსი მინიმალურად დაამარცხა

ჩემპიონთა ლიგის საერთო ფაზის მე-7 ტურში ლონდონის ჩელსიმ საკუთარ მოედანზე კვიპროსული პაფოსი დაამარცხა.

სტემფორდ ბრიჯზე გამართული შეხვედრა მინიმალური ანგარიშით 1:0 დასრულდა.

პირველ ტაიმში როსენიორის გუნდი ენცო ფერნანდესის გოლით დაწინაურდა, თუმცა მსაჯმა დარტყმამდე ერთი წამით ადრე არგენტინელის მხრიდან თამაშის წესების დარღვევა დაინახა და გოლი არ ჩათვალა.

საბოლოოდ, დიდი სათამაშო უპირატესობის ანგარიშში გამოსახვა ლონდონელებმა მხოლოდ 78-ე წუთზე შეძლეს — მატჩის ერთადერთი გოლი მოიზეს კაისედომ გაიტანა და თავის ახალ მწვრთნელს, ლიამ როსენიორს პრემიერ ლიგის შემდეგ, ჩემპიონთა ლიგაზეც წარმატებული დებიუტი აჩუქა.

ჩელსიმ 13 ქულა დააგროვა და ბოლო ტურის წინ მე-8 პოზიციას იკავებს, რომელიც პირდაპირ 1/8 ფინალის საგზურს იძლევა. ბოლო ტურში პენსიონერები სტუმრად ნაპოლის დაუპირისპირდებიან, რომელსაც 24 საუკეთესოში მოსახვედრად აუცილებლად გამარჯვება დასჭირდება, რადგან ამ ეტაპზე 25-ე პოზიციას იკავებს.