საშინელი სტარტი - ლა ლიგის სამი ტურის შემდეგ ატლეტიკო კვლავ გამარჯვების გარეშეა

ლა ლიგის მესამე ტურის შემდეგ, ატლეტიკო მადრიდი კვლავ მოუგებელია.

პირველ ტურში ესპანიოლთან მარცხისა და მეორეში ელჩესთან ფრის შემდეგ, მესამეში სიმეონეს გუნდი ალავესს პირველი გამარჯვების მოპოვების იმედად ეწვია.

მატჩის მე-7 წუთზე ჯულიანო სიმეონემ თავისი გუნდი დააწინაურა, თუმცა მადრიდელებმა უპირატესობა დიდი ხანი ვერ შეინარჩუნეს - უკვე მე-13 წუთზე მათ კარში პენალტი დაინიშნა, რომელიც თავდამსხმელმა კარლოს ვისენტემ შეასრულა და წონასწორობა აღადგინა.

დარჩენილ დროში ატლეტიკო სათამაშო უპირატესობას ფლობდა, თუმცა რეალურ საგოლე მომენტამდე საქმე დიდად არ მიდიოდა.

საბოლოოდ, ანგარიში აღარ შეცვლილა და სამი ტურის შემდეგ ატლეტიკო კვლავ მოუგებელია - სიმეონეს გუნდმა მხოლოდ მე-2 ქულა აიღო 9 შესაძლოდან და მე-14 ადგილს იკავებს.