არგენტინის საფეხბურთო ნაკრები 2026 წლის მსოფლიო ჩემპიონატის 1/16-ფინალური ეტაპისთვის ემზადება, სადაც მათი მეტოქე კაბო-ვერდეს ნაკრები იქნება.
გუნდის მთავარი მწვრთნელი ლიონელ სკალონი აცხადებს, რომ არგენტინა ტურნირზე კარგ ფორმაშია, თუმცა გუნდს აფრთხილებს, რომ პლეი-ოფის სტადიაზე, სადაც თითოეული შეხვედრა გადამწყვეტია, შეცდომის დაშვების უფლება არავის აქვს და კაბო-ვერდესთან მატჩი მარტივი ნამდვილად არ იქნება.
მთავარმა მწვრთნელმა ყურადღება გაამახვილა მეტოქის სტილზეც და აღნიშნა, რომ კაბო-ვერდე ორგანიზებული გუნდია, რომელიც თავს კარგად იცავს და კონტრშეტევებზე ეფექტურად გადადის. სკალონიმ ასევე გააკრიტიკა მატჩის ჩანიშვნის დრო (ადგილობრივი დროით 18:00), რაც მაიამის პირობებში მაღალ ტემპერატურასა და ტენიანობას გულისხმობს. მისი თქმით, ეს სანახაობაზე უარყოფითად აისახება და შეხვედრის ღამით გამართვა უფრო მიზანშეწონილი იქნებოდა.
გუნდის მზადების პროცესზე ისაუბრა როდრიგო დე პაულმაც, რომელმაც ხაზი გაუსვა არგენტინის მყარ სათამაშო იდენტობას და ადაპტაციის მნიშვნელობას. დე პაულის განცხადებით, მიუხედავად იმისა, რომ გუნდმა მსოფლიო ჩემპიონობა უკვე მოიპოვა, მოტივაცია კვლავ უმაღლეს დონეზეა.
რაც შეეხება შემადგენლობას, არგენტინის ნაკრებს თითქმის ყველა მოთამაშე მწყობრში ჰყავს, მათ შორის კრისტიან რომერო, რომელმაც ტრავმა მოიშუშა. ძირითადი ინტრიგა კვლავ მარცხენა მცველის პოზიციასა და თავდასხმაში არსებულ კონკურენციას უკავშირდება, სადაც ლაუტარო მარტინესი და ხულიან ალვარესი იბრძვიან სასტარტო ადგილისთვის ლიონელ მესისა და ტიაგო ალმადას გვერდით.
