ბრაზილიის ნაკრებისა და მადრიდის რეალის ახალგაზრდა ვარსკვლავმა, ენდრიკმა მსოფლიო ჩემპიონატზე ნეიმართან მუშაობის გამოცდილება გააზიარა და ნაკრების მთავარი მწვრთნელი, კარლო ანჩელოტი შეაქო.
1/16 ფინალში იაპონიასთან მოგებული მატჩის შემდეგ, სადაც ენდრიკი მოედანზე შესვენებისას შევიდა და თამაშში გარდატეხა შეიტანა, ფორვარდმა იტალიელი სპეციალისტის ტაქტიკურ გენიას გაუსვა ხაზი.
„ნეიმართან ძალიან კარგი ურთიერთობა მაქვს. ვხუმრობთ, კარტს ვთამაშობთ და სათადარიგო სკამზეც გვერდიგვერდ ვსხედვართ. მისგან და სხვა გამოცდილი მოთამაშეებისგან, როგორიცაა მარკინიოსი ან კაზემირო, მაქსიმუმის სწავლას ვცდილობ“, — აღნიშნა ენდრიკმა.
ლიონში მოთამაშე თავდამსხმელმა ანჩელოტიზეც ისაუბრა: „ის მსოფლიოს ერთ-ერთი უდიდესი მწვრთნელია. ზუსტად იცის, რას აკეთებს. როცა ის რაღაცას მავალებს, უკან არ ვიხედავ, უბრალოდ ვუსმენ და ვასრულებ. ის ყოველთვის გუნდისთვის საუკეთესოს აკეთებს“.
ბრაზილიის ნაკრები მუნდიალის მერვედფინალში ნორვეგიასთან მატჩისთვის ემზადება. ლუკას პაკეტას ტრავმისა და რაფინიას გაურკვეველი მდგომარეობის ფონზე, დიდია შანსი, ანჩელოტიმ ენდრიკი ამჯერად სასტარტო შემადგენლობაში გაამწესოს.
