საქართველოს ახალგაზრდული ნაკრები უეფას 21-წლამდე ევროპის ჩემპიონატის მეორე მატჩში, ჟილინაში საფრანგეთის ნაკრებს დაუპირისპირდება .
მატჩისწინა პრესკონფერენციაზე ნაკრების მთავარმა მწვრთნელმა, რამაზ სვანაძემ მედიასთან ისაუბრა.
"პოლონეთთან გამარჯვების შემდეგ გუნდში დადებითი განწყობაა. ძალიან მნიშვნელოვანი 3 ქულა მოვიპოვეთ. სატურნირო მდგომარეობიდან გამომდინარე ჩვენთვის ეს ბევრს ნიშნავდა, თუმცა უნდა გამოვყო, რომ ბოლო წამებზე მოპოვებულ გამარჯვებას კიდევ უფრო მეტი დადებითი ემოცია ახლავს.
მაქსიმალურად ვეცადეთ და ძალები აღვიდგინეთ. გუნდში საბრძოლო განწყობაა. არც ტრავმების მხრივ გვაქვს მნიშვნელოვანი პრობლემები. ხვალინდელი თამაშისთვის მზად ვართ, დანარჩენი კი მინდორზე გამოჩნდება.
მიუხედავად მცირე დისკომფორტისა, ნოდარ ლომინაძე თამაშისთვის მზად არის. 23 ფეხბურთელით ჩამოვედით და ყველას აქვს მოედანზე გასვლის შანსი. თითოეული მოთამაშის იმედი მაქვს და მწამს. ნებისმიერი ფეხბურთელის მოედანზე გასვლა დამოკიდებულია თამაშის შინაარსზე და კონკრეტულ სიტუაციაში არსებულ საჭიროებებზე.
ისეთი მეტოქე გვყავს, რომ ზედმეტი მოტივაცია არ გვჭირდება. ყველას გააზრებული აქვს, თუ ვისთან გვაქვს თამაში. ამ შეხვედრაში ყველაფრის სწორად დაგეგმვის და შესრულების შემთხვევაში, სულ სხვა ასპარეზი იშლება ჩვენს წინაშე როგორც გუნდურად, ისე თითოეული ფეხბურთელისთვის". - სვანაძის სიტყვებს ნაკრების გვერდი ავრცელებს.
საფრანგეთი - საქართველოს მატჩი 14 ივნისს, თბილისის დროით 23:00 საათზე დაიწყება.
ამ ბიჭებს დააკვირდით - გამარჯვება დანაკლისის ფონზე და ბრძოლა პლეიოფისთვის
