ტიმო ვერნერი სან-ხოსე ერვკვეიკსის მაისურით გატანილი პირველი გოლის შემდეგ ბედნიერებას ვერ მალავდა.
„აბსოლუტურად აღფრთოვანებული ვარ. მოედანზე მყოფ ყველა მოთამაშეს სჭირდება გოლების გატანა და ასისტების გაკეთება, მაგრამ ყველაზე მეტად თავდამსხმელებს. ეს წვლილი დიდ თვითდაჯერებას მატებს და გუნდის ნდობას გიმყარებს“, - განაცხადა ყოფილმა გერმანელმა ინტერნაციონალმა მას შემდეგ, რაც მისმა გუნდმა MLS-ის ლიდერთა დაპირისპირებაში ლოს-ანჯელესი 4:1 (0:0) დაამარცხა.
30 წლის ფორვარდი მატჩის მთავარ გმირად იქცა = სან-ხოსე ერვკვეიკსმა ბოლო რვა მატჩში მეშვიდე გამარჯვება მოიპოვა, ვერნერმა კი ჯერ უსენი ბუდას გაატანინა (53-ე წუთი), სამ წუთში კი თავადაც გამოიჩინა თავი.
„აშკარაა, რომ ტიმო ჩვენთვის განსაკუთრებული მოთამაშე იქნება“, - აღნიშნა გუნდის მწვრთნელმა, ბრიუს არენამ. „გარკვეული დრო დასჭირდება, რომ ოპტიმალური ფიზიკური ფორმა და რიტმი დაიბრუნოს, მაგრამ ის გამორჩეული ფეხბურთელია და ჩვენს გუნდს ძალიან გააძლიერებს“.
ვერნერი, რომელიც MLS-ს იანვარში, ლაიფციგიდან შეუერთდა, გარკვეული პერიოდი ტრავმის გამო უქმობდა. ამჟამად მის ანგარიშზე ხუთ შეხვედრაში ერთი გოლი და სამი საგოლე გადაცემაა.
„ორმაგად სასიამოვნოა, როცა ასეთ ლამაზ გოლს იტან“, - დასძინა ფეხბურთელმა. „ზოგადად, ჩემთვის მნიშვნელოვანი იყო ტაბლოზე საკუთარი გვარის კვლავ ხილვა. მიხარია, რომ გუნდს მოგებაში დავეხმარე“.
ამ გამარჯვების შემდეგ სან-ხოსე ერვკვეიკსს 21 ქულა დაუგროვდა და დასავლეთ კონფერენციის სათავეში თომას მიულერის ვანკუვერ უაითქეფსს გაუტოლდა. ლოს-ანჯელესი კი 16 ქულით მესამე ადგილზე დარჩა.
