ტოტენჰემის ხელმძღვანელობამ ოფიციალურად აღიარა, რომ საფეხბურთო წარმატება მათი გადაწყვეტილებების მთავარი მამოძრავებელი ძალა აღარ იყო. კლუბის არააღმასრულებელმა თავმჯდომარემ, პიტერ ჩარინგტონმა, გულშემატკივრებისადმი მიწერილ ღია წერილში შეცდომები აღიარა და გუნდის რეკონსტრუქციის პირობა დადო.
სპურსმა პრემიერ ლიგაში ადგილი ძლივს შეინარჩუნა. მათ ბოლო ტურში ევერტონი 1-0 დაამარცხეს და სეზონი მე-17 ადგილზე დაასრულეს. ჩარინგტონის თქმით, ეს შედეგი მოლოდინებს რადიკალურად ჩამორჩებოდა.
მან აღნიშნა, რომ გასულ სექტემბერში კლუბში სეისმური ცვლილებების საჭიროება დაინახეს. მფლობელმა, ლუისის ოჯახმა, სრული გადატვირთვის ბრძანება გასცა. თავმჯდომარე აღიარებს, რომ ეს გადაწყვეტილება იმაზე გვიან იქნა მიღებული, ვიდრე საჭირო იყო.
ეს გადატვირთვა ასევე დაემთხვა დანიელ ლევის წასვლას, რომელიც კლუბს თითქმის 25 წლის განმავლობაში ხელმძღვანელობდა.
პროცესის განმავლობაში ხელმძღვანელობა არასასიამოვნო სიმართლეს წააწყდა. თვისებები, რაც ტოტენჰემს გამორჩეულს ხდიდა - ამბიცია და კავშირი ფანებთან - უბრალოდ გაქრა. კლუბს წამყვან პოზიციებზე შესაბამისი ექსპერტები არ ჰყავდა და შემადგენლობაც არ იყო პრემიერ ლიგის დონისთვის საკმარისი.
ამჟამად გუნდს რობერტო დე ძერბი წვრთნის. იტალიელი სპეციალისტი მარტის ბოლოს დაინიშნა და მიმდინარე სეზონში კლუბისთვის უკვე მესამე მწვრთნელი გახდა, თომას ფრანკისა და იგორ ტუდორის შემდეგ. გუნდის ვარსკვლავებმა, ჯეიმს მედისონმა და კონორ გალაგერმა, დე ძერბის კლუბის კატასტროფისგან გადარჩენა უკვე მიულოცეს.
ჩარინგტონმა ასევე უპასუხა ხმებს კლუბის გაყიდვის შესახებ და ხაზგასმით აღნიშნა, რომ ტოტენჰემი არ იყიდება. მისი თქმით, ლუისის ოჯახი სრულად არის ჩართული გუნდის აღდგენის პროცესში.
კლუბი სერიოზულ ინვესტიციებს გეგმავს სატრანსფერო ფანჯრის დროს, რათა დე ძერბის კონკურენტუნარიანი გუნდი აუშენონ. გარდა ამისა, რეფორმა შეეხება სამედიცინო დეპარტამენტს, აკადემიასა და ქალთა გუნდსაც.
