საერთაშორისო ოლიმპიური კომიტეტი ფიფას პრეზიდენტის, ჯანი ინფანტინოს წინააღმდეგ გამოძიებას არ დაიწყებს.
კომიტეტის გადაწყვეტილებით, მის წინააღმდეგ შეტანილი საჩივარი მათ იურისდიქციაში არ შედის და შესაბამისად, საფეხბურთო სამყაროს მთავარი ფიგურა ამ სკანდალს უმტკივნეულოდ გადაურჩა.
საჩივარი ადამიანის უფლებათა დამცველმა ორგანიზაციამ FairSquare-მა შეიტანა. ისინი ინფანტინოს ოლიმპიური ქარტიის დარღვევასა და პოლიტიკური ნეიტრალიტეტის უგულებელყოფაში ადანაშაულებდნენ, რაც ამერიკის შეერთებული შტატების პრეზიდენტის მიმართ მის ღია მხარდაჭერაში გამოიხატა.
სკანდალი მსოფლიო ჩემპიონატის დროს აგორდა, როდესაც დონალდ ტრამპმა საჯაროდ განაცხადა, რომ ინფანტინოს დაურეკა და ამერიკელი თავდამსხმელის, ფოლარინ ბალოგუნის წითელი ბარათის გაუქმება პირადად სთხოვა.
ბოსნია-ჰერცეგოვინასთან მოგებულ მატჩში მიღებული გაძევების გამო ბალოგუნს ბელგიასთან მერვედფინალი უნდა გამოეტოვებინა, თუმცა საქმეში ტრამპის ჩარევამ ყველაფერი შეცვალა. ფიფამ ფეხბურთელს ერთმატჩიანი დისკვალიფიკაცია 12 თვით შეუჩერა და ეს მხოლოდ სასჯელის გადავადების ზოგადი მუხლით ახსნა. შედეგად, ბალოგუნმა ბელგიასთან ითამაშა, თუმცა ამერიკელები 4:1 განადგურდნენ.
ბრალდება იმ ფაქტს ეფუძნებოდა, რომ ინფანტინო 2020 წლიდან საერთაშორისო ოლიმპიური კომიტეტის წევრია. ოლიმპიური ქარტიის მეორე მუხლი კი პირდაპირ კრძალავს წევრების მიერ მთავრობებისგან ან სხვა ორგანიზაციებისგან ისეთი მითითებების მიღებას, რაც მათ დამოუკიდებლობასა და თავისუფლებას შეზღუდავს.
BBC-ის ცნობით, ოლიმპიურმა კომიტეტმა განმარტა, რომ ეს საკითხი მათი ეთიკის კომისიის კომპეტენციას სრულიად სცდება. მათი თქმით, საქმე ეხება საერთაშორისო ფედერაციის შიდა მმართველობას, მის ადმინისტრაციულ გადაწყვეტილებებს და მთავრობებთან ურთიერთობას, რაც ოლიმპიური კომიტეტის წესდებით არ რეგულირდება.
ეს გადაწყვეტილება მას შემდეგ გახდა ცნობილი, რაც ნორვეგიის ფეხბურთის ფედერაციამ ბალოგუნის სკანდალური დისკვალიფიკაციის გამო ფიფას ეთიკის კომიტეტში ოფიციალური საჩივრის შეტანის სურვილი საჯაროდ გამოთქვა.
