მანჩესტერ სიტის მწვრთელმა, პეპ გვარდიოლამ, კიდევ ერთხელ აღნიშნა, რომ თუ მისი გუნდი ჩელსის ვერ დაამარცხებს, საჩემპიონო იმედები საბოლოოდ გაქრება.
ამ უქმეებზე სიტი არსენალს ცხრა ქულით ჩამორჩება, თუმცა მათ მარაგში ორი გამოტოვებული მატჩი აქვთ (მას შემდეგ, რაც არსენალი შაბათს ბორნმუთთან დამარცხდა). იმის გათვალისწინებით, რომ მეთოფეები მომავალ კვირას ეტიჰადს ეწვევიან, სიტის ტიტულის შანსები მცირეა.
გვარდიოლამ განაცხადა:
არ ვიცი, რა მოხდება. სხვაობა დიდია, ამას ვერ უარვყოფ. ცხრა ქულა და ერთი გამოტოვებული თამაში - მაგრამ ეს თამაში ჯერ მოსაგებია. დისტანცია დიდია. არსენალის ერთხელ დამარცხებაც კი საოცრებაა, წარმოიდგინეთ, ეს ორჯერ რომ გავაკეთოთ. ჩემპიონთა ლიგაზე მათ არცერთი მატჩი არ წაუგიათ. მათი ციფრები, სტაბილურობა და დეტალები უმაღლესი დონისაა.
სულ არსენალზე, არსენალზე და არსენალზე ვსაუბრობთ. თუ სტემფორდ ბრიჯზე ვერ მოვიგებთ, რაც არ არის იოლი, მაშინ არსენალთან მატჩის წინ პრესკონფერენციის ჩატარებაც აღარ დაგვჭირდება, რადგან ყველაფერი დასრულებული იქნება. ყველამ იცის ეს: თქვენც, მეც, ფეხბურთელებმაც და მთელმა ინგლისმაც. ბევრი თამაშია დარჩენილი და ყველა მათგანი უნდა მოვიგოთ. ერთი ფრეც კი აღარ გვაწყობს. ცხრა ქულა არსენალის წინააღმდეგ ძალიან ბევრია.
გვარდიოლამ მიმდინარე სეზონიც შეაფასა:
პრემიერ ლიგის სეზონი 11 თვე გრძელდება. ამ დროის განმავლობაში ბევრჯერ ვიყავით კარგები, მაგრამ არა საკმარისად კარგები მოსაგებად. წარსულში ყოველთვის ვპოულობდით გზას გამარჯვებისთვის მაშინაც კი, როცა ძალიან ცუდად ვთამაშობდით. წელს კი ეს გზა ვერ ვიპოვეთ. ქულების თვალსაზრისით თუ შევადარებთ იურგენის ლივერპულს ან არსენალის 90-ქულიან სეზონებს, წელს ჩვენ საუკეთესოები არ ვყოფილვართ. თუმცა, მომავალში მზად ვიქნებით, რომ უფრო ახლოს ვიყოთ და ბრძოლა გავაგრძელოთ.
მიუხედავად პრემიერ ლიგაში არსებული სირთულეებისა, სიტიმ წელს უკვე მოიგო ერთი ტიტული. კარაბაოს თასის ფინალში სწორედ არსენალი დაამარცხა. ასევე, ისინი კვლავ იბრძვიან ინგლისის თასისთვის, სადაც გასულ უქმეებზე ნახევარფინალში გავიდნენ.
